Për pagën minimale s’ka para, do të ulen koeficientët e funksionarëve

Edhe pse për “paratë X, plus 1.500 denarë, të rritura për 8% në tre vitet e ardhshme” në një pjesë të opinionit pati habi dhe debat, për dy sindikatat përfaqësuese që organizojnë punonjësit e administratës dhe të drejtësisë kjo ishte një ofertë serioze. Të dyja thanë “PO” për propozimin e qeverisë, sipas të cilit pagat e 11.000 punonjësve në këto institucione do të rriten për 40% deri në vitin 2028.

“Çfarë është edhe më e mirë për ne si sindikatë është se kjo e drejtë jepet nëpërmjet një marrëveshjeje individuale kolektive, që do të thotë se në çdo kohë, nëse vendosim të sigurojmë më shumë të drejta, të favorshme për punonjësit, procedura e nënshkrimit ose ndryshimit të kësaj marrëveshjeje kolektive do të jetë shumë më e shpejtë”, tha Trpe Deakovski.

“Sot ndodh një fitore historike për punonjësit e administratës. Ajo për të cilën kemi protestuar gjatë viteve, padrejtësia më në fund është korrigjuar”, deklaroi Blagoja Ralpovski.

Megjithatë, kjo rritje do të kërkojë më shumë fonde nga buxheti. Qeveria duhet të sigurojë mbi 10 milionë euro në vit për të financuar këto paga. Kryeministri Mickoski tha se ekonomia ka sfida, por rritja e pagave nuk do të pengojë konsolidimin fiskal të vendit. Paratë nuk do të sigurohen nga taksa të reja.

“Sigurisht, në disa fusha do të duhet të shkurtojmë, diku të mundohemi më shumë të mbledhim, flas për disiplinën fiskale, jo për rritjen e taksave, por për rritjen e disiplinës fiskale, zvogëlimin e ekonomisë së zezë dhe në thelb rritjen e të ardhurave në buxhet”, u shpreh Hristijan Mickoski.

Mickoski shtoi se edhe punonjësit duhet të justifikojnë rritjen e pagave duke përmirësuar shërbimet ndaj qytetarëve. Qeveria e matë këtë indikator çdo muaj përmes anketave. Ai gjithashtu theksoi se nuk është e pranueshme që paga minimale të rritet në 600 euro me kompensimin e diferencës nga qeveria, pasi buxheti nuk ka fonde për këtë.

“Jo, jo, sepse ne kemi dhënë 250 milionë euro kredi të subvencionuara për biznesin me normë interesi 1,95%, sepse nuk i rrisim taksat siç kërkojnë disa institucione financiare ndërkombëtare, që kërkojnë 20% TVSH, nuk e rrisim moshën e pensionimit siç kërkojnë disa institucione të tilla.”