Maqedonia e Veriut ndalon eksportin e grurit, miellit dhe druve
Me propozim të Ministrisë së Ekonomisë, Qeveria në seancën e sotme solli vendim për të kufizuar eksportin e produkteve të caktuara dhe vendim për heqjen e doganës për import të vajit për ushqim nga luledielli.
Siç njoftoi ministri i Ekonomisë, Kreshnik Bekteshi, këto vendime janë miratuar me qëllim për të shmangur veprimet spekulative të tregtarëve dhe prodhuesve dhe për të mbrojtur prodhimin vendorë, tregun vendas dhe qytetarët, si dhe të ruhet furnizimi në tregun vendor nga rritja e çmimeve.
“Me qëllim të parandalimit të shqetësimeve serioze të tregut vendorë, të cilat mund të ndodhin me eksportin e grurit dhe miellit nga vendi, Qeveria mori vendim që të kufizojë eksportin e grurit, miellit dhe thekërit deri në fund të vitit, pra deri më 31.12.2022. Në kushtet e krizës ekonomike të shkaktuar nga zhvillimet e luftës në Ukrainë dhe ndërprerjet në tregun botëror të grurit, ku paraqitet mungesë e grurit, është e nevojshme të parandalohen ndërprerjet e mundshme shtesë në tregun e vendit për këto produkte ushqimore bazë të nevojshme për ushqimin të popullatës”, bëhet e ditur në kumtesën e Ministrisë së Ekonomisë.
Gjithashtu, me propozim të Ministrisë së Ekonomisë, në seancën e sotme të Qeverisë është marrë vendim që të kufizohet eksporti i druve për ngrohje dhe peletit deri në fund të vitit, gjegjësisht deri më 31.12.2022
“Ky vendim për kufizimin e përkohshëm të eksportit të druve për ngrohje, drurit të papërpunuar dhe peletit është miratuar me qëllim të parandalimit dhe shmangies së pasojave të shkaktuara nga kërkesa e shtuar e popullatës për dru për ngrohje të shkaktuar nga kriza energjetike në tregun botëror”, theksojnë nga Ministria e Ekonomisë dhe shtojnë se vendimi për ndalimin e përkohshëm të eksportit të disa asortimenteve të drurit kanë sjellë edhe qeveritë e Serbisë, Bosnjë dhe Hercegovinës dhe Malit të Zi.
Po ashtu, me propozim të Ministrisë së Ekonomisë dhe në konsultim me Ministrinë e Bujqësisë, Pylltarisë dhe Ekonomisë së Ujërave, Qeveria solli vendim për heqjen e taksës së importit – normës doganore për importin e vajit të lulediellit për shkak të nevojës për të ruajtur ofertën e tregut të brendshëm nga rritja e çmimeve.
Ky vendim do të jetë në fuqi deri më 31.12.2022. Ky vendim u zbatua deri më 31 maj 2022. Përkatësisht, norma e rregullt doganore e vajit të lulediellit ushqimor është maksimumi 29 për qind, kështu që me këtë masë mundësohet importi nga vendet tjera për të cilat nuk ka trajtim preferencial.
