Nga janari, plus 400 euro në xhepat e funksionarëve në RMV
400 euro të tjera do të depozitohen në llogaritë e funksionarëve me pagën e janarit, njoftojnë nga Sindikata e Pavarur e Administratës Shtetërore. Kjo për shkak të rritjes së pagës mesatare në vend, për vitin 2023. Këto 400 euro janë vetëm një plotësim i rritjes prej 78 për qind, e cila tashmë është marrë nga rreth dy mijë persona që nga prilli, duke përfshirë presidentin, kryeministrin, ministrat, deputetët, kryetarët e komunave, gjyqtarët dhe të tjerët. Kështu, sipas llogaritjeve të Sindikatës së Pavarur të Administratës Shtetërore, nga 160 mijë denarë, pagat mujore të Pendarovskit, Kovaçevskit dhe Xhaferit në fund të muajit do të jenë 184 mijë denarë, ose tre mijë euro, pasuar nga Artan Grubi dhe Fatmir Bytyqi me rreth 175 mijë denarë secili. Megjithatë, Bytyqi tha në nëntor se kjo rritje e re prej 400 eurosh nuk do të parashikohej në buxhetin e ri, dhe se qeveria ka vendosur të mos e rrisë pagën e janarit për funksionarët e saj. Përndryshe, pas revoltës në publik që nga vendimi i Gjykatës Kushtetuese në mars, qeveria njoftoi se do të kërkonte një zgjidhje për rritjen prej 78%, por vetëm arriti në përfundimin se do të duhej ndryshuar shtatë ligje. As opozita nuk paraqiti ndryshime, deputetët dhe kryetarët e të cilëve kanë paga më të larta. VMRO DPMNE sot kundërshtoi rritjen e mundshme të janarit, por nuk ofroi zgjidhje.
“Pagat e Kovaçevskit, Pendarovskit, Xhaferit, Spasovskit, Grubit, Osmanit, Mariçiqit, Gërkovskës, Petrovskës dhe ministrave të tjerë në qeverinë e LSD-së dhe BDI-së në përputhje me ligjin për rritjen mesatare të pagave do të rriten me 400 euro shtesë këtë vit 2024″, thonë nga VMRO-DPMNE.
Më herët, Kovaçevski tha se tema e uljes së pagave të zyrtarëve të zgjedhur dhe të emëruar nuk ka mbaruar, por që kjo të ndodhë, ministrat dhe deputetët dhe përfaqësuesit e gjyqësorit duhet të bien dakord. LSDM-ja sot nuk i komentoi pagat më të larta të funksionarëve. Nga partia në pushtet u përqendruan në rritjen e pagës mesatare, e cila tashmë është 39 mijë denarë, dhe njoftojnë një pagë minimale më të lartë në mars, përmes metodologjisë së re.
“Në vitin e ri vazhdon rritja e pagave dhe pensioneve, me LSDM çdo punëtor merr më shumë. Që nga marsi, vijon rritja tjetër e pagës minimale në 22,500 denarë. LSDM ka rritur pagën minimale katër herë në gjashtë vjet, dhe këtë vit 2024 pason një rritje tjetër”, u shpreh Elena Ustamitova, LSDM.
Rritja e pagave të funksionarëve prej 78%, është parashikuar edhe në buxhetin e ri për vitin 2024, megjithëse pritej që përllogaritja e vjetër e pagave të funksionarëve të kthehej në periudhën nga prilli deri në dhjetor. Kjo nuk ndodhi, dhe së fundmi Talat Xhaferi, kandidat për kryeministër teknik tha se tema e pagave nuk është pjesë e prioriteteve të tij por organizimi i zgjedhjeve. Qeveria teknike pritet të fillojë punën më 28 janar, kështu që ka të ngjarë që kjo çështje të presë një përbërje të re parlamentare dhe një qeveri të re./Alsat.mk
