Avokatët e Thaçit u tërhoqën nga mbrojtja se nuk paguheshin, Ministria e Drejtësisë publikon pagesat e tyre për tre vite
Ministria e Drejtësisë së Kosovës pas reagimit për tërheqjen e avokatëve të ish-presidentit Hashim Thaçi për shkak të mos pagesës, ka publikuar edhe një foto dokument, që drejton shpenzimet e avokatëve mbrojtës, të të akuzuarve të tjerë.
Ministria tha fillimisht se ka kryer të gjitha detyrimet lidhur me pagesën apo kompensimin e mbrojtjes së Thaçit, i cili po gjykohet në Gjykatën Speciale për krime lufte.
Sipas të dhënave të Ministrisë, avokati i ish-kryeparlamentarit Jakup Krasniqit është paguar për tre vjet 3,697,250 euro. Avokati i ish-kryetarit të Kuvendit të Kosovës, Kadri Veselit për të njëjtën periudhë është paguar 3,359,724 euro. Avokati i ish-deputetit të Kuvendit, Rexhep Selimit për tre vjet është paguar 3,629,700 euro.
Njoftimi nga Ministria e Drejtësisë:
NJOFTIM
Ministria e Drejtësisë përmes këtij njoftimi, dëshiron të mirë-informojë publikun e gjerë dhe të sqarojë lajmet lidhur me pagesat e avokatëve të personave të cilët akuzohen nga Dhomat e Specializuara të Kosovës.
Në përputhje me Udhëzimin Administrativ numër 08/2022 për Mbrojtjen Juridike të Personave të Akuzuar Potencial për Krimet e Pretenduara në Proceset Gjyqësore pranë Dhomave të Specializuara, Ministria e Drejtësisë ka lidhur marrëveshje për përfaqësim me avokatët përkatës të personave të akuzuar, në këtë rast, me mbrojtjen e z. Hashim Thaçi, për të cilin rast, raportohet tërheqja e mbrojtjes për shkak të mos realizmit të pagesave.
Në përputhje me Udhëzimin dhe Marrëveshjen e tillë (legjislacionin në fuqi), Ministria e Drejtësisë ka kryer të gjitha obligimet lidhur me pagesën apo kompensimin e mbrojtjes së z. Hashim Thaçi. Për më shumë, vetëm për vitin 2023, Ministria e Drejtësisë ka realizuar pagesa për mbrojtësit e z. Hashim Thaçi në shumën prej 1,371,800.00 Euro.
Pagesa për mbrojtjen e z. Hashim Thaçi janë realizuar për vitet 2021, 2022 dhe 2023.
Për vitin 2021 është realizuar pagesë prej 1,024,301.02 Euro, për vitin 2022 pagesa është realizuar në shumën prej 1,087,200 Euro, dhe për vitin 2023 – është realizuar pagesë në shumën prej 1,371,800 Euro.
Për të gjitha vitet, shuma e pagesës për mbrojtjen e z. Hashim Thaçi, është 3,483,301.02 Euro.
Për sqarim tutje, Ministria e Drejtësisë realizon pagesa vetëm me avokatet më të cilët ka marrëveshje, në përputhje me legjislacionin në fuqi.
Aktualisht, Ministria e Drejtësisë ka Marrëveshje me avokatin mbrojtës të Hashim Thaçit, Luka Misetiq, të cilit në përputhje me Marrëveshjen, i realizon të gjitha pagesat me kohë.
Ndërsa për avokatet tjerë potencial, qoftë edhe privat, të cilët angazhohen nga z. Thaçi, Ministria e Drejtësisë nuk ka Marrëveshje dhe nuk mbanë përgjegjësi për realizmin e pagesave.
Pra, Ministria e Drejtësisë, në përputhje me Udhëzimin e tillë dhe legjislacionin në fuqi, ka realizuar me kohë të gjitha pagesat dhe obligimet për mbrojtjen e z. Hashim Thaçi.
