Bejxhan Iljas me votat e Frontit shkon në VMRO? Iljas: Ne jemi pjesë e Frontit dhe vazhdojmë bashkë

Burime të TV21 brenda VMRO-DPMNE-së bëjnë të ditur se janë të interesuar që Partia Demokratike Turke e Bejxhan Iljas të bëhet pjesë e koalicionit qeverisës së VMRO-së, edhe pse Iljas është pjesë e Frontit Europian, ku doli edhe deputet. TV21 kontaktoi Iljas, i cili mohoi një gjë të tillë.

“Në asnjë moment nuk kemi biseduar, as nuk na ka kontaktuar njeri, as nuk kemi kontaktuar askënd për të ndërruar anë, koalicionin, pra për të qenë pjesë e Qeverisë. E shoh që këto ditë ka spekulime, por ne qëndrojmë pas marrëveshjes që kemi nënshkruar me Frontin Europian dhe vazhdojmë së bashku”, tha Iljas për TV21.

Në pyetjen tonë shtesë, nëse ai personalisht, si kandidat që ka marrë mandatin për deputet, mendon ndryshe nga partia, ai shton:

“As nuk është mendim personal, as një plan. Nuk është e drejtë politikisht. Partia nuk e ka tradhtuar kurrë partnerin politik në historinë e saj. Në vitin 2016 u larguam nga koalicioni VMRO-DPMNE dhe qëndruam në opozitë për disa muaj, duke e ditur se duhej të kontribuonim në ndryshimet që ndodhën për të qenë pjesë e Aleancës së NATO-s”, theksoi Iljas për TV21.