Destani takohet me Kasamin: I lumtur që erdhi momenti i nisjes së ndërtimit të stadiumit të Tetovës

Biznesmeni Lazim Destani është takuar me kryetarin e komunës së Tetovës, Bilall Kasami, që siç ka njoftuar, është biseduar për mundësitë e bashkëpunimit krahas projektit të stadiumit të qytetit, përcjell TV21. E për stadiumin e Tetovës, Destani tha se është i lumtur që së shpejti do të fillojnë punimet dhe shtoi se, ky projekt është kurorëzim i punës dhe sakrificës së brezit të vjetër tetovar.

“Sot këtu në Tetovë, në ambientet e kompanisë Ecolog, e prita për vizitë Kryetarin e Komunës së Tetovës, Bilall Kasami. Në këtë takim, krahas projektit të stadiumit të qytetit, ne diskutuam në përgjithësi mbi mundësitë e bashkëpunimit mes kompanisë sonë dhe Komunës. Për sa i takon stadiumit të Tetovës, unë shpreh kënaqësinë që tashmë kanë përfunduar të gjitha procedurat formale, përfshirë dhe lejen e ndërtimit që është marrë këto ditë.

Jam i lumtur që erdhi momenti i shumëpritur i nisjes së ndërtimit të këtij stadiumi. Uroj punët ndërtimore të këtij projekti të shkojnë mbarë e mirë. Stadiumi i ri i Tetovës, si një vlerë e shtuar për qytetin tonë, është kurorëzim i punës dhe sakrificës së brezit të vjetër tetovar në shërbim të sportit, sport-dashësve dhe në mënyrë të veçantë, në shërbim të brezave të ardhshëm”, tha Destani.