Arabia Saudite planifikon t’i paguajë borxhet e Sirisë ndaj Bankës Botërore

Arabia Saudite planifikon t’i paguajë borxhet e Sirisë ndaj Bankës Botërore, duke e hapur rrugën për miratimin e granteve milionëshe

Arabia Saudite planifikon që t’i paguajë borxhet që Siria ia ka Bankës Botërore, i kanë thënë agjencisë së lajmeve “Reuters” tre persona të afërt me çështjen, duke e hapur rrugën për miratimin e miliona dollarëve grante për rindërtim dhe për mbështetjen e sektorit publik të paralizuar të vendit.

Këto plane, për të cilat nuk është raportuar më parë, do të ishin rasti i parë i njohur kur Arabia Saudite i ofron mbështetje financiare Sirisë që nga rrëzimi i ish-presidentit Bashar al-Assad vitin e kaluar nga rebelët, raporton agjencia “Reuters”.

Kjo gjithashtu mund të jetë shenjë që përkrahja jetike e vendeve arabe të Gjirit Persik po fillon të konkretizohet, pasi planet e mëparshme, përfshirë një nismë nga Katari për financimin e pagave, u pezullua nga paqartësia rreth sanksioneve nga ShBA-ja.

Muajin e kaluar, Katari njoftoi një plan për ta furnizuar Sirinë me gaz përmes Jordanisë në mënyrë që të përmirësohej furnizimi i dobët i vendit me energji elektrike, veprim për të cilin burimet i thanë agjencisë “Reuters” se e kishte miratimin nga Uashingtoni.

Një zëdhënës i Ministrisë së Financave të Arabisë Saudite agjencisë “Reuters” i tha: “Ne nuk i komentojmë spekulimet, por bëjmë njoftime, nëse dhe kur ato të bëhen zyrtare.”

Zyra mediale e qeverisë saudite, një zëdhënës i Bankës Botërore dhe një zyrtar qeveritar sirian nuk iu përgjigjën menjëherë kërkesave për koment.

Siria ka rreth 15 milionë dollarë borxhe të palara ndaj Bankës Botërore, të cilat duhet të paguhen para se ky institucion financiar ndërkombëtar të mund të miratojë grante dhe të ofrojë forma të tjera të asistencës.

Megjithatë, Siria ka mungesë të valutës së huaj dhe një plan i mëparshëm për t’i paguar borxhet duke shfrytëzuar asete të ngrira jashtë vendit nuk ishte materializuar, sipas dy personave të afërt me çështjen.

Zyrtarë të Bankës Botërore kanë diskutuar rreth ofrimit të financimit për ta ndihmuar rindërtimin e rrjetit energjetik të Sirisë, i cili është dëmtuar rëndë nga lufta, dhe gjithashtu për mbështetjen e pagesave në sektorin publik, thanë dy prej burimeve.