Trump vijon me ndërprerjen e fondeve, i kërkon Kongresit të shkurtojë rreth 5 miliardë dollarë të tjera ndihmë ndërkombëtare
Donald Trump i ka kërkuar Kongresit Amerikan të miratojë një shkurtim shtesë prej 4.9 miliardë dollarësh në ndihmën ndërkombëtare, tha Shtëpia e Bardhë sot, më 29 gusht, një njoftim që rrit ndjeshëm shanset për një mbyllje federale në fund të shtatorit.
Shkurtimet “kanë të bëjnë me programet e Departamentit të Shtetit, si dhe me Agjencinë e Kombeve të Bashkuara për Zhvillim Ndërkombëtar dhe programet e ndihmës ndërkombëtare”, sqarohet në letrën dërguar kryetarit republikan të Dhomës së Përfaqësuesve dhe të publikuar nga Zyra e Buxhetit të Shtëpisë së Bardhë.
Presidenti Trump “gjithmonë do ta vërë Amerikën në vend të parë”, shkroi zyra e Shtëpisë së Bardhë. Demokratët kishin njoftuar së fundmi se çdo qëllim nga ana e presidentit amerikan për të anuluar fondet e miratuara tashmë nga Kongresi do të shkatërronte çdo mundësi negociimi me ta me qëllim shmangien e mundësisë së paralizës fiskale, të ashtuquajturës “mbyllje”, pas 30 shtatorit.
Sipas gazetës Neë York Post, e cila e zbuloi këtë informacion mbrëmë, shumica dërrmuese e shkurtimeve – 3.2 miliardë dollarë – kanë të bëjnë me fondet për Agjencinë Amerikane për Zhvillim Ndërkombëtar (USAID).
Donald Trump ka pezulluar tashmë miliarda dollarë fonde për ndihmë ndërkombëtare pas kthimit në Shtëpinë e Bardhë dhe ka shpërbërë zyrtarisht USAID-in, i cili tani është përthithur në Departamentin e Shtetit.
