Osmani, Kurti dhe Basha homazhe te Monumenti i Personave të Zhdukur
Me rastin e Ditës Ndërkombëtare të Viktimave të Zhdukjeve me Dhunë, presidentja e Kosovës Vjosa Osmani, kryetari i Kuvendit Dimal Basha dhe kryeministri në detyrë Albin Kurti bënë homazhe te Monumenti i Personave të Zhdukur.
Homazhe bënë edhe ambasadorë të akredituar në Kosovë, familjarë të të zhdukurve dhe qytetarë.
Deklarata për media e Kryeministrit në detyrë, Albin Kurti në prag të Ditës Ndërkombëtare të të Zhdukurve me Dhunë
Në prag të Ditës Ndërkombëtare të Personave të Zhdukur, bashkë me Presidenten e Republikës dhe Kryetarin e Kuvendit, përkulemi para monumentit këtu afër institucioneve të shtetit, që i dedikohet personave të zhdukur me dhunë gjatë luftës e nën okupim të Serbisë.
1584 njerëz të vendit tonë ende mungojnë. Fati i tyre duhet të zbardhet sa më parë dhe për këtë, institucionet e shtetit tonë po bëjnë maksimumin.
Në vitin e kaluar kemi gërmuar e gjurmuar në 23 lokacione të ndryshme, ndërkaq sivjet kemi pasur 18 aktivitete për hulumtim e për kërkim të mbetjeve mortore të më të dashurve tanë, të cilët i vrau Serbia dhe jo vetëm që i zhvarrosi, por edhe ua rrëmbeu kufomat. Në anën tjetër, gërmimet në Kozhle të Serbisë nuk kanë filluar ende, ndërkaq në Batajnicë afër Beogradit, nuk kanë rifilluar ende, paçka se u bënë dy vjet që ne e kemi edhe Marrëveshjen e Brukselit edhe Deklaratën përkatëse për këtë çështje.
Mohimi i drejtësisë ndaj viktimave tona të luftës së fundit, në fakt paraprihet nga mohimi i krimeve të kryera nga Serbia, që e bën Beogradi zyrtar.
Ne i falënderojmë partnerët dhe miqtë tanë ndërkombëtarë për mbështetjen që po na japin në zbardhjen e fatit të të pagjeturve edhe sa i përket mbështetjes profesionale edhe sa i përket asaj teknologjike, dhe njëkohësisht kërkojmë nga ta që të bëjnë më shumë trysni mbi pushtetin në Beograd, sepse në arkivat e tyre dhe te zyrtarët e tyre ndodhet edhe e vërteta që nuk po zbardhet, por edhe përgjegjësia për atë çfarë na ka ndodhur neve si palë që e pësoi gjenocidin e fundit të Serbisë mbi popullin shqiptar të Kosovës.
Deklarata për media e Presidentes Vjosa Osmani në prag të Ditës Ndërkombëtare të të Zhdukurve me Dhunë:
Presidentja e Republikës së Kosovës, Vjosa Osmani së bashku me Kryetarin e Kuvendit, Dimal Basha, kryeministrin në detyrë Albin Kurti si dhe me familjet e të zhdukurve me dhunë nga lufta e fundit në Kosovë, kanë bërë nderime tek Monumenti i Personave të Zhdukur.
Në vijim, gjeni të plotë deklarimin e Presidentes Osmani për media:
Sot, në Ditën Ndërkombëtare të të Zhdukurve, sikurse edhe çdo vit, jemi bashkë me familjet e të zhdukurve me dhunë nga lufta e fundit në Kosovë për të përkujtuar secilin prej tyre, por po ashtu për ta ngritur zërin tonë edhe një herë për drejtësi dhe për ta ngritur zërin tonë për këtë krim të vazhdueshëm të Serbisë.
Dhe e them që është krim i vazhdueshëm sepse, përtej krimeve që janë kryer në vitin ’98 dhe ’99 nga ana e Serbisë, zhdukja me dhunë e personave, të dashurve të shumë familjeve këtu në Kosovë, është krim të cilin Serbia e kryen çdo ditë, duke i mbajtur ata në varreza masive, duke mos respektuar marrëveshjet e arritura në Bruksel për ta zbardhur fatin e këtyre të zhdukurve me dhunë, Serbia çdo ditë kryen krim kundër njerëzimit dhe çdo ditë shkel konventa ndërkombëtare për të drejtat e njeriut.
Ne jemi edhe sot në solidaritet të plotë me familjet, të cilat akoma jetojnë në ankth dhe në dhimbje të pafund, edhe 26 vite pas luftës, por përtej fjalëve, jemi bashkë me familjet në përpjekjet tona të vazhdueshme për drejtësi dhe në përpjekjet tona të vazhdueshme për ta mbajtur Serbinë përgjegjëse për këtë krim të përsëritur.
I bëjmë thirrje edhe një herë të gjithë aleatëve tanë, të gjithë miqve tanë ndërkombëtarë, që t’i bëjnë presion të vazhdueshëm Serbisë, këtij shteti gjenocidal, këtij shteti që akoma jo vetëm e mohon krimin, por edhe e fsheh krimin, duke i mbajtur të zhdukur me dhunë mijëra shqiptarë nga Kosova, por njëkohësisht edhe viktima nga luftërat e tjera që Serbia i ka shkaktuar në ish-Jugosllavi.
Do të vazhdojmë të punojmë së bashku deri në kthimin edhe të qytetarit të fundit nga Republika jonë, mirëpo duhet ta përsërisim që liria jonë nuk do të jetë e plotë pa rikthimin e tyre.
