BDI denoncon Bilall Kasamin: Premtojnë kontrata fiktive për të blerë vota me para serbe

BDI Tetovë ka reaguar ashpër ndaj veprimeve të kryetarit aktual të Komunës së Tetovës, Bilall Kasami, duke e akuzuar atë dhe bashkëpunëtorët e tij për shpërdorim të fondeve dhe tentativa për blerje votash.

Sipas njoftimit të BDI-së, Kryetari Kasami dhe drejtuesit e ndërmarrjeve komunale po premtojnë kontrata fiktive, që përveçse shkelje ligjore, dëmtojnë edhe xhepat e qytetarëve. Partia i bën thirrje prokurorisë të hulumtojë menjëherë aktivitetet e ndërmarrjeve komunale, si dhe qytetarëve t’u rezistojnë këtij mashtrimi.

Më poshtë njoftimi i plotë i BDI-së:

Të nderuara media
Të nderuar qytetarë

Me afrimin e zgjedhjeve komunale që pritet të mbahen në tetor, nga frika dhe panika e humbjes, Kryetari i Komunës së Tetovës Bilall Kasami së bashku me klanin e tij dhe drejtorët e ndërmarrjeve komunale, po premtojnë kontrata fiktive që përveç se përbëjnë shkelje serioze ligjore e dëmtojnë rëndë edhe xhepin e qytetarëve.

I bëjmë thirrje prokurorisë që në mënyrë të menjëhershme, të hulumtojnë aktivitetet dhe transaksionet e ndërmarjeve komunale të cilat duan t’i shfrytëzojnë për blerje të votave.
U bëjmë thirrje edhe qytetarëve që të mos bien pre e këtij mashtrimi që bëhet 1 muaj para zgjedhjeve, pasi që të njëjtit që tani tentojnë të shpërndajnë para, që të na vjedhin përsëri 4 vitet e ardhshme.

Më e turpshmja është që votat e shqiptarëve po mundohen t’i blejnë me donacionet që i morën nga kompanitë SERBE!
E pyesim publikisht Bilall Kasamin, ku e shitët shpirtin dhe për sa? Çfarë borxhi u keni kompanive serbe që me parat e tyre po tentoni të bleni votat e shqiptarëve e të fitoni komunën?

Qytetarët kësaj radhe do i thonë JO BOTËS SERBE, JO MASHTRIMEVE dhe JO KRIMIT!
Pavarësisht se po e shitni TETOVËN, tetovarët as nuk janë në shitje e as nuk i bleni dot!