Jep dorëheqje Presidenti Bullgarisë, Rumen Radev
Presidenti i Bullgarisë, Rumen Radev, ka njoftuar sot e hënë se po jep dorëheqjen nga posti i tij. Në një fjalim televiziv, Radev tha se të martën do ta dorëzojë zyrtarisht dorëheqjen në Gjykatën Kushtetuese.
Sipas Kushtetutës, detyrën e presidentit do ta marrë nënkryetarja aktuale, Iliana Yotova, e cila do të betohet në Kuvend dhe do ta ushtrojë funksionin deri në përfundim të mandatit presidencial.
“Beteja për të ardhmen e atdheut tonë është përpara nesh dhe besoj se do ta përballojmë së bashku me ju, me njerëzit e denjë, të frymëzuar dhe të palëkundur. Ne jemi gati. Mundemi dhe do të kemi sukses”, tha Radev në fjalimin e tij.
Vendimi i tij vjen mes pritjeve publike se ai mund të themelojë një parti të re politike. Dorëheqja e Radev është e para nga një president në historinë post-komuniste të Bullgarisë dhe ndodh në një kohë kur vendi, anëtar i Bashkimit Evropian dhe NATO-s, po përballet me një krizë të zgjatur politike.
Muajin e kaluar, protesta masive kundër korrupsionit detyruan qeverinë në largim, të udhëhequr nga partia e qendrës së djathtë GERB, të japë dorëheqjen. Përpjekjet për formimin e një qeverie të re brenda parlamentit aktual kanë dështuar, duke e çuar vendin drejt zgjedhjeve të teta parlamentare që nga viti 2021.
Mandati i dytë i Radev përfundon në vitin 2026 dhe ai ka sinjalizuar vazhdimisht se mund të marrë pjesë në zgjedhjet e ardhshme. Ish-gjenerali 62-vjeçar i Forcave Ajrore ka qenë një kritik i ashpër i liderit të GERB-it, Boyko Borissov, si dhe i politikanit dhe oligarkut Delyan Peevski, i cili ndodhet nën sanksione të SHBA-së dhe Mbretërisë së Bashkuar. Partia e tij, MRF New Beginning, ka mbështetur disa herë koalicionin në largim të udhëhequr nga GERB.
Radev nuk dha detaje për planet e tij të ardhshme. I pyetur së fundmi për mundësinë e krijimit të një partie të re, ai u shpreh se Bullgarisë i duhet një forcë politike që “bashkon të gjithë demokratët, të majtë e të djathtë, pavarësisht se ku bëjnë pjesë ose nëse janë aktivë politikisht, sepse të gjithë kemi nevojë për zgjedhje të ndershme dhe zhvillim demokratik e të lirë”.
