Çmimi i arit arrin rekord historik, tregjet në pritje të fjalimit të Trump në Davos
Çmimi i arit u rrit në nivelin më të lartë historik të mërkurën, duke kaluar kufirin e 4.800 dollarëve për ons, ndërsa tregjet financiare globale u përfshinë nga pasiguria në pritje të mbërritjes së presidentit amerikan Donald Trump në Forumin Ekonomik Botëror në Davos.
Rritja e metalit të çmuar vjen në një klimë tensionesh të shtuara mes Shteteve të Bashkuara dhe Bashkimit Evropian, për shkak të planeve të Trump për Groenlandën. Ari u rrit me mbi 2% gjatë ditës, pasi investitorët po kërkojnë asete të sigurta për të mbrojtur kapitalin nga rreziqet gjeopolitike dhe kërcënimet për tarifa të reja tregtare. Edhe argjendi shënoi rritje, duke u rritur me 0.44% në 95.055 dollarë për ons.
Kur u pyet të martën se deri ku ishte i gatshëm të shkonte për të siguruar Groenlandën, Trump u përgjigj shkurt: “Do ta zbuloni”. Shtetet e Bashkuara nuk kanë përjashtuar ndërhyrjen ushtarake dhe kanë paralajmëruar tarifa shtesë ndaj tetë vendeve evropiane nëse nuk përmbushen kërkesat amerikane lidhur me ishullin.
Pas një viti rekord në 2025, analistët mbeten optimistë për ecurinë e çmimit të arit edhe gjatë vitit 2026. Faktorët kryesorë që e mbështesin këtë trend janë pritjet për ulje të normave të interesit në SHBA, dobësimi i dollarit amerikan dhe vazhdimi i blerjeve të arit nga bankat qendrore.
Dobësimi i dollarit e bën arin më të përballueshëm për blerësit e huaj, duke rritur kërkesën dhe çmimin e tij. Ndërkohë, normat më të ulëta të interesit e bëjnë arin më tërheqës krahasuar me asetet që gjenerojnë interes, si obligacionet.
Investitorët po spekulojnë gjithashtu se kryetari i ardhshëm i Rezervës Federale, i cili pritet të zëvendësojë Jerome Powell në maj, do të ndjekë një politikë monetare më lehtësuese. Kandidati do të emërohet nga presidenti Trump, i cili ka kritikuar vazhdimisht qasjen e kujdesshme të Powell ndaj uljes së normave të interesit.
Megjithëse bankat qendrore po reduktojnë gradualisht varësinë nga dollari në favor të arit, ekspertët theksojnë se dollari amerikan mbetet ende monedha kryesore rezervë në botë, duke përbërë rreth 57% të rezervave globale.
Sipas analistëve të ING, dollari ka ende hapësirë për rimëkëmbje. Ata vlerësojnë se dobësimi i mëparshëm ishte i lidhur me paqëndrueshmërinë në tregun japonez të bonove dhe shqetësimet se investitorët evropianë mund të shesin obligacionet amerikane.
Ndërkohë, tregjet evropiane të aksioneve vijuan rënien: indeksi francez CAC 40 ra me 0.18%, DAX gjerman me 0.68%, IBEX 35 spanjoll me 0.53% dhe FTSE MIB i Italisë me 0.68%. Indeksi STOXX Europe 500 humbi 0.35%, ndërsa FTSE 100 në Mbretërinë e Bashkuar shënoi një rënie të lehtë.
Në SHBA, tregjet sinjalizuan një hapje më pozitive: S&P 500 u rrit me 0.34%, Dow Jones me 0.13% dhe Nasdaq me 0.19%.
Tregjet globale mbeten në pritje të sinjaleve politike nga Davosi, ku çdo deklaratë e Trump mbi Groenlandën, tarifat tregtare apo politikat monetare pritet të ketë ndikim të drejtpërdrejtë në ekonominë botërore.
