Trump kërcënon të bllokojë urën e re SHBA-Kanada mes tensioneve tregtare
Presidenti i SHBA-së, Donald Trump, ka kërcënuar të bllokojë hapjen e një ure të re që lidh Shtetet e Bashkuara të Amerikës dhe Kanadanë, duke përmendur mungesën e “drejtësisë dhe respektit” nga qeveria kanadeze mes tensioneve të vazhdueshme tregtare.
“Nuk do të lejoj që kjo urë të hapet derisa Shtetet e Bashkuara të Amerikës të kompensohen plotësisht për gjithçka që u kemi dhënë atyre, dhe gjithashtu, është e rëndësishme që Kanadaja t’i trajtojë Shtetet e Bashkuara të Amerikës me Drejtësinë dhe Respektin që meritojmë”, shkroi Trump në platformën e tij “Truth Social”.
Ai gjithashtu kërkoi që, Ura Ndërkombëtare Gordie Howe mbi lumin Detroit, të ishte të paktën gjysmë në pronësi të SHBA-së, duke shtuar se negociatat do të fillonin menjëherë.
Ura lidh qytetin e Windsor në provincën kanadeze të Ontarios me Detroit në shtetin amerikan të Miçiganit dhe është projektuar për të mbajtur gjashtë korsi trafiku, si dhe këmbësorë dhe çiklistë.
Kanadaja po financon ndërtimin, i cili do të kompensohet përmes taksave, dhe ura është planifikuar të hapet këtë vit. Zyrtarët thanë se kjo do të rriste tregtinë midis vendeve fqinje.
Trump kritikoi Kanadanë për mospërdorimin e produkteve amerikane si çeliku në ndërtim dhe për angazhimin e saj të kufizuar të shpallur së fundmi me Kinën në tregti, një veprim që e kishte shtyrë atë të kërcënonte me tarifa 100% ndaj importeve kanadeze dhe tarifa ndaj avionëve kanadezë.
Trump ka përdorur shpesh kërcënime me tarifa për të çuar përpara politikat e tij, ndonjëherë pa i zbatuar ato.
