Rama nga Lezha: Shqipëria do të integrohet në BE brenda vitit 2030

Kryeministri Edi Rama gjatë fjalës së tij në Asamblenë e Partisë Socialiste, në Lezhë, tha se Shqipëria do të integrohet në Bashkimin Evropian brenda vitit 2030.

Kreu i qeverisë tha se kapitujt e negociatave janë hapur në kohë rekord dhe pritet të përfundojnë në vitin 2027. Pas kësaj, sipas tij mbeten rreth dy vite kohë për të marrë miratimin nga të 27 vendet anëtare, dhe nëse edhe një vend thotë jo, integrimi i Shqipërisë në BE bëhet i pamundur.

“E vërteta është që ne i kemi hapur kapitujt e negociatave në një kohë rekord, që ka ardhur edhe si rezultat i punës tonë dhe rezultatit të punës së tyre.

Kjo duhet të jetë një fushatë për të folur me të gjithë socialistët dhe me të gjithë mbështetësit tanë kudo ku ndodhen. Kur unë thoja që do integrohemi në BE brenda vitit 2030, të gjithë thoshin është gënjeshtër. Në fakt ishte një marrëveshje me Komisionin Evropian për të ekzekutuar një kalendar pune dhe për të kryer detyrat e shtëpisë ne si Shqipëri, me një ambicie të madhe dhe plan ambicioz që përfundon në vitin 2027. Pastaj, pas përfundimit në 2027 të negociatave me Komisionin, mbetet koha rreth 2 vite për të marrë miratimet në Parlamentet e vendeve anëtare.

Në këtë fazë janë 27 vende anëtare, sepse aty duhet të thonë të gjithë po. Nëse vetëm një vend thotë jo, atëherë integrimi në BE është i pamundur. Ne kemi bërë pjesën tonë dhe janë bashkuar edhe yjet e fatit tonë. Nuk duhet të presim që dera e hapur e BE-së do rrijë hapur dhe do na presë ne. Dera është e hapur dhe ne duhet të hyjmë brenda”, u shpreh Rama.