Kryeministri në detyrë Kurti u takua me kryeministrin e landit Nordrhein-Westfalen, Wüst

Kryeministri në detyrë i Republikës së Kosovës, Albin Kurti, zhvilloi sot një takim me kryeministrin e landit Nordrhein-Westfalen, Hendrik Wüst, në kuadër vizitës zyrtare në Gjermani.

Kryeministri në detyrë Kurti shprehu mirënjohje të thellë për mbështetjen historike të Gjermanisë, nga pritja e refugjatëve kosovarë gjatë luftës së viteve 1998–1999 deri tek kontributi vendimtar në rindërtimin e vendit pas luftës. Ky solidaritet, theksoi ai, është themeli mbi të cilin ndërtohet partneriteti i sotëm.

Në takim u diskutua për thellimin e bashkëpunimit dypalësh ndërmjet shteteve, me theks të veçantë rolin që mund të ketë mërgata në ndërtimin e urave lidhëse për rritjen e aktivitetit të përbashkët ekonomik dhe shkëmbimet tregtare.

Kryeministri në detyrë Kurti, po ashtu, foli për rëndësinë e shkëmbimeve kulturore dhe atyre të arsimit profesional.

Foto: Kryeministri në detyrë Kurti u takua me kryeministrin e landit Nordrhein-Westfalen, Wüst

Kryeministri në detyrë Kurti u prit në parlamentin e Nordrhein-Westfalen

Në kuadër të vizitës zyrtare në Gjermani, kryeministri në detyrë i Republikës së Kosovës, Albin Kurti, është mirëpritur nga përfaqësues të parlamentit të Nordrhein-Westfalen.

Ai fillimisht u prit nga zëdhënësi i Komitetit Kryesor nga SPD, Hartmut Ganzke, dhe kreu i Komitetit për Evropë dhe Çështje Ndërkombëtare, Stefan Engstfeld, dhe më pas nga shefi i Grupit Parlamentar të SPD, Jochen Ott.

Krahas falënderimeve për mbështetjen e Gjermanisë ndaj Kosovës, kryeministri në detyrë Kurti foli për mundësitë e bashkëpunimit në fushën e diplomacisë parlamentare.

Në takime, u diskutua për mërgatën si urë lidhëse për bashkëpunimin ekonomik e tregtar, e po ashtu për infrastrukturën dhe mobilitetin, përkatësisht rëndësinë e aeroporteve regjionale. Ndërsa arsimi, me theks të veçantë mundësitë për programe të bursave dhe të shkëmbimeve, ishin po ashtu tema të takimit.

Kryeministri në detyrë Kurti foli edhe për mundësitë e bashkëpunimit në sektorin e energjisë, marrë parasysh se Nordrhein-Westfalen është regjioni kryesor energjetik dhe industrial në Gjermani.

Ai, po ashtu, u shkrua në Librin e Artë të Parlamentit të Nordrhein-Westfalen, i paraparë për nënshkrime nga mysafirë të rangut të lartë që vizitojnë këtë institucion.