Prokuroria Speciale ngrit aktakuzë ndaj Fatmir Shehollit për spiunazh dhe shantazh

Prokuroria Speciale e Kosovës ka ngritur aktakuzë ndaj Fatmir Shehollit ., i cili dyshohet për veprat penale “Spiunazh” dhe “Shantazh”.

Sipas aktakuzës, dyshohet se ai, në cilësinë e personit të rekrutuar, ka ndihmuar veprimtarinë e Shërbimit Informativ të Serbisë.

“Sipas aktakuzës, F.Sh., nga një datë e papërcaktuar e deri më 9 tetor 2025, në cilësinë e personit të rekrutuar nga Shërbimi Informativ i Serbisë, i njohur si “BIA”, e ka ndihmuar veprimtarinë e këtij shërbimi, duke vepruar sipas urdhrave dhe detyrave të zyrtarëve të tij”, thuhet në njoftimin e prokurorisë.

Ai dyshohet se me Shërbimin Informativ të Serbisë, i njohur si “BIA”, ka ndarë informacione lidhur me aktivitetet politike, gjendjen e sigurisë dhe funksionimin e institucioneve të Republikës së Kosovës.

“I pandehuri F.Sh. akuzohet se ka mbledhur, siguruar dhe përcjellë përmes mesazheve telefonike të dhëna, informacione dhe dokumente lidhur me aktivitetet politike, gjendjen e sigurisë dhe funksionimin e institucioneve të Republikës së Kosovës”, thuhet më tej në aktakuzë.

Ndërkaq, për veprën penale “Shantazhi”, ai akuzohet se gjatë periudhës nga viti 2022 deri në dhjetor 2025, ka shantazhuar të dëmtuarin A.J., duke e detyruar të veprojë në dëm të pasurisë së tij, në shumën që tejkalon 13 mijë euro.

“Sipas aktakuzës, F.Sh. i ka kërkuar të dëmtuarit para në emër të huazimit, duke e kërcënuar se, në rast të mosdhënies së parave, do të publikonte në media video-incizime dhe informacione që do t’i dëmtonin rëndë nderin, reputacionin dhe autoritetin e të dëmtuarit”, bëhet e ditur më tej në aktakuzë.

Lidhur me rastin, bëhet e ditur se çështja tashmë ka kaluar në shqyrtim në Gjykatën Themelore, ndërsa i pandehuri ndodhet nën masën e paraburgimit.

Ja sa paguhej Fatmir Sheholli nga Serbia (FOTO DOKUMENTI)

Prokuroria Speciale ka zbuluar një shumë të të hollave në vlerë të përgjithshme prej 681 mijë dinarësh, apo afër gjashtë mijë euro, të cilat Fatmir Sheholli i kishte pranuar nga autoritetet në Serbi.
Kjo shumë e përgjithshme e të hollave ishte pranuar nga Sheholli në vitin 2015, në llogarinë e tij në Komercialna Banka, ka zbuluar Prokuroria.

Pagesat i kishin ardhur nga dy institucione: agjencia shtetërore e lajmeve “Tanjug” në Serbi dhe e ashtuquajtura Zyrë për Kosovë në qeverinë serbe.

“Nga dëshmia A#21 rezulton se i pandehuri Fatmir Sheholli, gjatë vitit 2015, ka pranuar në mënyrë të rregullt pagesa mujore në llogarinë e tij në Komercialna Banka A.D. Beograd nga dy institucione shtetërore të Republikës së Serbisë, përkatësisht Agjencia Shtetërore e Lajmeve “Tanjug” në shumën totale prej 386.000 dinarësh dhe “Kancelarija za Kosovo I Metohija” në shumën prej 295.000 dinarësh, apo gjithsej 681.000 dinarë”, thuhet në dosjen e Prokurorisë ndaj të dyshuarit për spiunazh, Fatmir Sheholli.

Sipas Prokurorisë, pranimi i këtyre pagesave periodike “nga institucione shtetërore serbe që direkt janë të lidhura me BIA-në, përbën fakt notor që dëshmon financimin dhe angazhimin e tij në interes të një shteti të huaj, konkretisht nga Serbia dhe në ndërlidhje me provat e tjera të rastit vërtetohet edhe përtej dyshimit të bazuar mirë se i pandehuri ka ndërmarr veprimtari spiunazhi në dobi të BIA-së e në dëm të interesave të Republikës së Kosovës.”