Turqia shpëton 43 azilkërkues në Detin Egje

Turqia ka shpëtuar së paku 43 azilkërkues të cilët ishin bllokuar derisa përpiqeshin të arrinin në ishullin grek të Lesbos-it në veri të Detit Egje, raporton Anadolu Agency (AA).

Rojet bregdetare në provincën veriperëndimore Balıkesir të Turqisë dërguan ekipe për të shpëtuar azilkërkuesit në Ishullin Pinar ku transporti tokësor nuk ishte i mundur. Ekipet shpëtuan 36 persona dhe i sollën në Qendrën e Komandës së Rojës bregdetare në ishullin Cunda.

Ndërkohë, në provincën veriperëndimore të Çanakkalasë, Rojet bregdetare shpëtuan shtatë azilkërkues të cilët u kthyen prapa nga Roja bregdetare greke në ujërat territoriale turke.

Turqia ka qenë një pikë kyçe tranziti për azilkërkuesit që synojnë të kalojnë në Evropë për të filluar jetë të re, veçanërisht ata që ikin nga lufta dhe persekutimi.

Turqia dhe grupet e të drejtave të njeriut kanë dënuar në mënyrë të përsëritur praktikën e paligjshme të Greqisë për të shtyrë mbrapa azilkërkuesit, duke thënë se ajo shkel vlerat humanitare dhe ligjin ndërkombëtar duke rrezikuar jetën e migrantëve, përfshirë gratë dhe fëmijët.