Kriporja e Ulqinit kthehet në pronësi shtetërore

Këshilli për Privatizim dhe Projekte Kapitale në Mal të Zi, njëzëri vendosi që Kriporja e Ulqinit të kthehet në pronësi shtetërore.

Këshilli, i kryesuar nga Kryeministri malazez Zdravko Krivokapiq, duke vepruar në bazë të kërkesës së Kriporës së Ulqinit në falimentim nga nëntori i vitit 2011, për të dhënë një mendim për vlerën e tregut të kësaj pasurie natyrore në procedurën e privatizimit, vlerësoi se shuma e tregtuar e letrave me vlerë nuk korrespondon me vlerën reale të pasurisë së patundshme të Kripores së Ulqinit dhe se, sipas kësaj, privatizimi është bërë në rrethana të dyshuara dhe jotransparente.

“Gjatë vendosjes për këtë çështje, Këshilli kishte parasysh të dhënat dhe gjetjet e hollësishme nga raporti i Komisionit për Vlerësimin e Tregut, me vendimin e Këshillit për të përcaktuar vlerën e Kriporës .Të dhënat e paraqitura nuk korrespondojnë me vlerën reale dhe si i tillë vendoset kthimi i kripores në pasuri shtetërore”, thuhet në njoftimin e qeverisë.

Këtë vendim e mbështeti edhe Zv/Kryeministri Dritan Abazoviq, i cili kthimin e pronës e quajti historike. Abazoviq falënderoi të gjithë ata që me vite kanë luftuar për ruajtjen e pasurive tona natyrore.

Megjithatë partia e spektrit politik shqiptar, Forca e Re Demokratike vlerëson se Kriporja është pronë e Komunës së Ulqinit.

”Qeveria deri më tani ka treguar kapacitetin e plotë vetëm për ta shkatërruar Kriporen dhe pronën e saj dhe tani i takon asaj që t’ia kthejë këtë pronë Komunës së Ulqinit”, thuhet në njoftimin e kësaj partie.

Kriporja e Ulqinit ishte ndër prodhuesit më të njohur të kripës në ish Jugosllavi me një sipërfaqe prej 15 mijë metrash katrorë. Është një lagunë e njohur dhe ndodhet në deltën e lumit Buna. Aty ka edhe një pasuri të madhe shpendësh ku ujërat e ëmbla të lumit bashkohen me ujin e kripur të detit duke krijuar një oazë të veçantë për shpendë dhe zogjtë shtegtar.

Në vitin 2003 kriporja u privatizua, si pasojë e falimentimit të ndërmarrjes, por kjo pasuri është shitur me një çmim tejet të ultë, vetëm 800 mijë euro. Çmimi i tokës u vendos 5 cent për metër katror, duke u cilësuar këtë privatizim si aferë korruptive e politikës së Partisë Demokratike Socialiste të presidentit Milo Gjukanoviq.

Kriporja e Ulqinit është vlerësuar edhe nga Bashkimi Evropian, i cili financoi edhe studimin për mbrojtjen dhe përmirësimin e kripores. Në këtë kuadër BE ka kushtëzuar vazhdimin e bisedimeve për anëtarësim me kapitullin 27 të marrëveshjes, kapitull që i kushtohet parkut natyror të Ulqinit.