Takohen Mustafa-Kurti, pajtohen për rrëzimin e qeverisë

Shpërndaje

Kryetari i Lëvizjes Vetëvendosje (VV), Albin Kurti, ka takuar sot kryetarin e Lidhjes Demokratike të Kosovës (LDK), Isa Mustafa.

LDK-ja dhe VV-ja janë partitë më të mëdha opozitare në Kosovë.

Në një postim në faqen e tij në Facebook, Kurti ka thënë se me Mustafën ka biseduar për situatën politike dhe iniciativën për mocionin e mosbesimit ndaj qeverisë.

“Kosova ka nevojë për zhvillim ekonomik e jo për korrupsion institucional. Qytetarët duan qeverisje të re, të mirë e të drejtë dhe jo keqqeverisje që na e rrit borxhin, zhvat buxhetin dhe falimenton ndërmarrjet. U pajtuam që t’i bëjmë përgatitjet e nevojshme për rrëzimin e qeverisë”, ka shkruar Kurti.

Megjithatë, për të pasur sukses një mocion për rrëzimin e Qeverisë, nevojiten 61 nga 120 votat e deputetëve të Kuvendit të Kosovës.

Tri partitë opozitare, Lidhja Demokratike e Kosovës, Lëvizja Vetëvendosje dhe Partia Socialdemokrate, i kanë gjithsej 56 deputetë në Kuvendin e Kosovës dhe për suksesin e një mocioni të mosbesimit për Qeverinë, nevojiten edhe 5 vota.