Shefi i mbrojtjes turke: Sovraniteti, integriteti dhe paqja në Kosovë janë të rëndësishme për Turqinë

Ministri i Mbrojtjes i Turqisë, Hulusi Akar, pas një takimi në Prishtinë me homologun e tij kosovar, Armend Mehaj, ka deklaruar se Kosova për Turqinë është një vend i rëndësishëm në Ballkan, raporton Anadolu Agency (AA).

Akar tha se duke marrë parasysh lidhjen historike marrëdhëniet mes dy vendeve janë shumë të rëndësishme për Turqinë.

“Ne si Turqi, si pjesë e Ballkanit, sigurisht që duhet t’i ndjekim nga afër ngjarjet në Ballkan dhe nga ky aspekt Kosova është e rëndësishme për punët tona. Në këto takime po përpiqemi të ndërmarrim hapa konkrete për të zhvilluar më tej marrëdhëniet dhe bashkëpunimin tonë”, tha Akar.

Ai theksoi se çështja e sovranitetit, integritetit dhe paqes në Kosovë është e rëndësishme edhe për Turqinë.

“Shpallja e pavarësisë së Kosovës dhe njohja e menjëhershme nga Turqia është shumë e rëndësishme. Në njërën anë është zhvillimi ekonomik i Kosovës dhe bashkëpunimi ynë ekonomik, ndërsa në anën tjetër është bashkëpunimi ynë në fushën ushtarake. Industria e mbrojtjes është zhvilluar në mënyrë pozitive kohët e fundit”, tha Akar.

Shefi turk i mbrojtjes theksoi se hapat që po ndërmerr Kosova në rrugën e integrimeve euro-atlantike janë të rëndësishme dhe se shkëmbimi i përvojës ushtarake dhe trajnimi mes dy vendeve është i rëndësishëm nga ky aspekt.

Më tej, Akar tha se situata në veri të Kosovës është monitoruar nga afër nga Turqia dhe tha se është i lumtur që çështja është zgjidhur. Ai po ashtu theksoi se Turqia është duke e monitoruar nga afër procesin e dialogut në mes të Prishtinës dhe Beogradit. Ai theksoi se dialogu është i një rëndësie të madhe dhe se për këtë arsye Turqia mbështet dialogun për të pasur stabilitet dhe paqe në Ballkan.

Akar po ashtu theksoi se në takime do të diskutohet për hapat konkrete që duhet të ndërmarrin institucionet e Kosovës kundër organizatës terroriste FETO, e cila është një kërcënim për të gjithë, jo vetëm për Turqinë.

Nga ana tjetër, Mehaj i vlerësoi si të shkëlqyera marrëdhëniet mes Kosovës dhe Turqisë, jo vetëm në planin diplomatik, por edhe në atë ushtarak. Ai tha se lidhja miqësore mes popullit kosovar dhe atij turk ka treguar se dy kombet jo vetëm që janë të lidhura historikisht, por kanë edhe një të ardhme të lidhur.

Mehaj tha se Kosova dhe populli i Kosovës asnjëherë nuk e harrojnë kontributin e Turqisë gjatë luftës, gjatë ndërtimit të shtetit të Kosovës dhe gjatë ngritjes së kapaciteteve të Forcës së Sigurisë së Kosovës (FSK).

“Sa i përket çështjes së mbrojtjes, Turqia është ndër më të rëndësishmet në ngritjen e kapaciteteve të Forcës së Sigurisë së Kosovës dhe ne do t’i jemi gjithmonë mirënjohës. Si ministër i Mbrojtjes, jam shumë mirënjohës për kontributin e mbështetjes së Turqisë në aspektin e mbrojtjes, sigurisë dhe paqes”, tha Mehaj.

Shefi i mbrojtjes kosovare theksoi nevojën për mbështetjen e Turqisë për anëtarësimin e Kosovës në Partneritetin për Paqe dhe në NATO.

Ministri turk, i cili qëndron për vizitën në Prishtinë, u prit nga homologu i tij kosovar me nderime më të larta ushtarake.

Akar u prit edhe nga presidentja e Kosovës, Vjosa Osmani dhe kryeministri Albin Kurti. Para vizitës në Kosovës, ai ishte për vizitë në Bosnjë e Hercegovinë.

Njoftimi nga Ministria e Mbrojtjes së Kosovës:

Ministri Mehaj priti në vizitë zyrtare ministrin e Mbrojtjes Kombëtare të Republikës së Turqisë, Hulusi Akar

Me nderime të larta ushtarake, ministri i Mbrojtjes, Armend Mehaj, priti në vizitë zyrtare ministrin e Mbrojtjes Kombëtare të Republikës së Turqisë, Hulusi Akar, me delegacionin e tij.

Fillimisht, ministri Mehaj i shprehu mirëseardhje homologut të tij turk dhe e falënderoi Republikën e Turqisë për kontributin që ka dhënë deri më tani për shtetin e Kosovës.

“Populli i Kosovës asnjëherë nuk e harron kontributin e Turqisë që ka dhënë në ditët tona më të vështira, por gjithashtu e falënderojmë edhe për kontributin e madh që po jep në ngritjen e kapaciteteve ushtarake”, tha ministri Mehaj.

Më tej, të dy ministrat biseduan lidhur me tema të ndryshme sa i përket sigurisë dhe mbrojtjes jo vetëm në Kosovë por në rajon dhe më gjerë, ku me këtë rast, ministri Mehaj e falënderoi ministrin Akar për kontributin e kontingjentit të forcave turke në kuadër të KFOR-it për paqen dhe sigurinë në vend.

Në këtë takim u bisedua edhe për shkëmbim të përvojave në sferën e edukimit, trajnimit të personelit ushtarak, gjithashtu edhe për pjesëmarrje në ushtrime të përbashkëta ushtarake.
Gjithashtu, u bisedua lidhur me mbështetjen e Republikën e Kosovës në integrimin në organizata euroatlantike.

“Përderisa bashkëpunimi në mes të dy vendeve tona po thellohet çdo ditë e më shumë, shteti i Turqisë po bën përpjekje të mëdha në integrimin e Kosovës në organizatat euroatlantike”, theksoi ministri turk i Mbrojtjes, Hulusi Akar, duke shtuar se hapat që ka marrë Republika e Kosovës deri më tani në fushën e diplomacisë së mbrojtjes, janë shumë të rëndësishëm.

Ministri Akar vazhdon vizitën e tij zyrtare me takimet e planifikuara edhe me Presidenten Osmani-Sadriu dhe Kryeministrin Kurti.