Pamje – Serbët në veri ngrohen edhe jashtë me nxemje me rrymë
Qytetarët serb në Mitrovicën e Veriut janë duke u ngrohur edhe në ambiente të jashtme me nxemje me energji elektrike.
Në afërsi të shkollës teknike në këtë komunë gjendet edhe Spitali, ndërsa është vendos edhe një qendër në të cilën po kryhen testimet për COVID-19.
Ajo që vërehet jashtë kësaj qendreje janë edhe disa nxemje që janë të vendosura jashtë dhe të njëjtat funksionojnë me energji elektrike.
Këto nxemje janë vendosur për të ngrohur qytetarët të cilët po presin në radhë për të kryer testimet për coronavirus.
Në këtë zonë ku është i vendosur Spitali dhe një qendër testimi e cila po shfrytëzon energjinë elektrike edhe jashtë, nuk paguan energji elektrike.
Në anën tjetër Zyra e Rregullatorit të Energjisë ka propozuar që të rikthehen bllok-tarifat e energjisë duke propozuar që çmimi i energjisë për ata që konsumojnë mbi 600 kilovat të dyfishohet.
Tarifat për biznese dhe 600 kilovatët e parë të amvisërisë do të vazhdojnë të faturohen me tarifat e njëjta që kanë qenë, pra nuk do të ketë shtrenjtim.
Kurse, tarifa për konsumatorët shtëpiak për konsumin mbi 600 kWh është dyfishuar. Tarifa për energjinë në tarifë të lartë nga 6.75 cent për kilovat është shtrenjtuar në 14 centë, apo një rritje prej 107%. Kurse, tarifa e ultë apo energjia e konsumuar gjatë natës nga 2.89 cent është shtrenjtuar në 6 centë, një rritje prej 107%.
Në anën tjetër Ministria e Ekonomisë ka konfirmuar do të ndajë 75 milionë euro për të zbutur ndikimin e krizës energjetike në tarifat e energjisë elektrike.
Mbrëmë në emisionin ‘Kallxo Përnime’ kryetari i bordit të Zyrës së Rregullatorit të Energjisë, Ymer Fejzullahu tha se KEDS, KESCO dhe KOSTT nuk kanë qasje në katër komunat me shumicë serbe, në veri të vendit.
