Presidenti ukrainas thirrje Perëndimit: Mos krijoni panik
Presidenti i Ukrainës, Volodymyr Zelensky, i ka bërë thirrje Perëndimit që të mos krijojë panik mes ngritjes së trupave ruse në kufijtë e vendit të tij.
Ai u tha gazetarëve se paralajmërimet për një pushtim të afërt po e rrezikonin ekonominë e Ukrainës
Të enjten, presidenti amerikan Joe Biden ka thënë se besonte se Rusia mund të sulmonte fqinjin e saj muajin e ardhshëm.
Rusia, megjithatë, mohon se po planifikon të pushtojë dhe të premten ministri i saj i Jashtëm ka thënë se Moska nuk dëshiron luftë.
Ndërsa Rusia ka rreth 100 mijë trupa në kufijtë e Ukrainës, Zelensky shtoi se ai nuk sheh një kërcënim më të madh tani sesa gjatë një grumbullimi të ngjashëm të trupave pranverën e kaluar.
“Ka sinjale edhe nga udhëheqës të respektuar të shteteve, vetëm thonë se nesër do të ketë luftë. Ky është panik – sa i kushton shtetit tonë?”, deklaroi ai në konferencën për shtyp në Kiev.
Zelensky kritikoi gjithashtu Britaninë, SHBA-në dhe Australinë për tërheqjen e familjeve të diplomatëve nga Ukraina, duke thënë se ishte një gabim
“Destabilizimi i situatës brenda vendit është kërcënimi më i madh për Ukrainën”, potencoi ai.
SHBA-ja ka refuzuar një kërkesë kyçe të Moskës që NATO të përjashtonte mundësinë e anëtarësimit të Ukrainës në aleancën e mbrojtjes – por këmbënguli se ajo po i ofronte Rusisë një “rrugë serioze diplomatike”
Presidenti rus Vladimir Putin më vonë akuzoi Perëndimin për injorimin e shqetësimeve të sigurisë së Rusisë.
Por ai deklaroi se do të studionte përgjigjen e SHBA-së përpara se të vendoste se çfarë të bënte, sipas një lexim të Kremlinit të një telefonate midis Putinit dhe homologut të tij francez Emmanuel Macron.
Franca ka thënë se të dy liderët kishin rënë dakord për nevojën për të de-përshkallëzuar dhe presidenti Macron i tha Putinit se Rusia duhet të respektojë sovranitetin e shteteve fqinje.
