Türkiye, OKB, Rusia dhe Ukraina nënshkruajnë marrëveshjen për zhbllokimin e drithit ukrainas

Türkiye, OKB-ja, Rusia dhe Ukraina nënshkruan sot marrëveshjen në Istanbul për rifillimin e eksporteve të drithërave ukrainase në Detin e Zi, raporton Anadolu Agency (AA).

Presidenti turk Recep Tayyip Erdoğan dhe Sekretari i Përgjithshëm i OKB-së Antonio Guterres morën pjesë në Ceremoninë e Nënshkrimit të Dokumentit të Iniciativës për Transportin e Sigurt të Drithërave dhe Produkteve Ushqimore nga Portet e Ukrainës në Pallatin Dolmabahçe së bashku me përfaqësuesit nga Rusia dhe Ukraina.

“Jemi krenarë që jemi instrumentalë në një nismë që do të luajë rol të madh në zgjidhjen e krizës globale të ushqimit që ka pushtuar gjithë botën për një kohë të gjatë”, tha presidenti Erdoğan.

“Ne do të kontribuojmë në parandalimin e rrezikut të urisë i cili pret miliarda njerëz në botë”, shtoi ai.

Marrëveshja e eksportit të grurit ukrainas e nënshkruar në Istanbul do të ndihmojë në lehtësimin e inflacionit global të ushqimit, theksoi Erdoğan.

Presidenti Erdoğan i bëri thirrje Rusisë dhe Ukrainës t’i japin fund luftës mes dy vendeve, e cila po mbush muajin e pestë.

Marrëveshja erdhi pas një ujdie të përgjithshme të arritur midis palëve mbi një plan të udhëhequr nga OKB-ja gjatë bisedimeve në Istanbul më 13 korrik për të formuar një qendër koordinimi për të kryer inspektime të përbashkëta në hyrje dhe dalje të porteve dhe për të garantuar sigurinë e rrugëve.

E vlerësuar ndërkombëtarisht për rolin e saj ndërmjetësues, Türkiye është koordinuar me Moskën dhe Kievin për të hapur një korridor nga qyteti port ukrainas i Odesës për të rifilluar dërgesat globale të drithërave që janë bllokuar për shkak të luftës Rusi-Ukrainë.

Duke folur përpara ceremonisë, Guterres falënderoi Türkiye-n për “lehtësimin dhe këmbënguljen” e saj në nënshkrimin e marrëveshjes.

Kjo nismë duhet të zbatohet plotësisht, sepse bota ka kaq shumë nevojë për të, theksoi shefi i OKB-së, duke e quajtur marrëveshjen një “fener shprese në Detin e Zi”.

“Do të sjellë lehtësim për vendet në zhvillim që janë në prag të falimentimit dhe njerëzit më të cenueshëm në prag të urisë”, tha ai.