Profesoresha e Universitetit të Tetovës Nurie Emrullai shpallet fituese e Çmimit “Kadare” për vitin 2023
Nurie Emrullai është shkrimtarja e re nga Kërçova e Maqedonisë së Veriut, që e mori këtë vit (26. 2. 2023), Çmimin letrar “Kadare” për vitin 2023. “Është një emër surprizë, por plotësisht i merituar nga bashkëkombësit tanë në Maqedoninë e Veriut, edhe për të provuar se letërsia e mirë shqipe shkruhet kudo dhe jo vetëm në Tiranë”, tha kryetarja e jurisë, shkrimtarja Natasha Lako.
Nurie Emrullai konkurroi me romanin “Duhet të jetë dashuria” dhe ishte fituese mes 27 dorëshkrimeve në prozë nga 27 autorë të këtij edicioni, të vitit 2023, që përkoi me edicionin e nëntë të këtij çmimi, themeluar në vitin 2014.
Motivacioni i veprës fituese të këtij çmimi, sipas votimit unanim të jurisë, është si më poshtë: Dorëshkrimi i romanit “Duhet të jetë dashuria” i shkrimtares Nurie Emrullai nga Maqedonia e Veriut dalloi për gjetjet stilistikore dhe talentin, për t’i dhënë mikrokozmosit të saj, një frymë letërsie universale.
Çmimi “Kadare” është themeluar në vitin 2014 me mbështetjen e Universitetit Europian të Tiranës dhe ka si mision inkurajimin e të shkruarit të letërsisë shqipe, përmes botimit dhe promovimit të veprës fituese, si dhe nxitjen e debatit për letërsinë shqipe. Tashmë ky çmim ka një gjeografi dhe listë impresionuese, duke filluar nga shkrimtarë që jetojnë dhe krijojnë në emigracion si, Shkëlqim Çela dhe Rudolf Marku, shkrimtarët nga Kosova, Musa Ramadani dhe Gani Mehmetaj, apo shkrimtarë të rinj si, Loer Kume nga Durrësi sikurse shkrimtarja e parë grua që e fitoi këtë çmim vitin e kaluar 2022, Vera Bekteshi.
Gjeografia e çmimit plotësohet edhe me krijuesit nga Maqedonia e Veriut, ku jeton dhe krijon Nurie Emrullai. Laureatja e këtij viti është shkrimtare e re, e cila ka botuar disa libra ku spikatin librat me poezi botuar në shtëpinë botuese “Onufri”. Dy vëllimet e saj me poezi “Vargmale nën dhe”, si dhe “Në orën moderne të perëndive” spikatin dhe romani që tashmë fitoi Çmimin “Kadare” e kompleton profilin letrar të autores. Nurie Emrullai aktualisht është asistente në Fakultetin Filologjik të Universitetit të Tetovës dhe doktorante për Letërsi, në Universitetin e Shkupit. Liberale.al
