Irak, gruaja 60-vjeçare i zgjon njerëzit për syfyr me defin e saj

Shpërndaje

REWA MAHMOOD HASAN/ BEKİR AYDOĞAN

Nahi Arif Muhammed (60), e cila jeton në qytetin Sulejmanije të Irakut, ka 10 vjet që i zgjon njerëzit për syfyr me defin e saj në Ramazan.

Krahas daulleve, që janë bërë traditë gjatë Ramazanit, Nahi nga Sulejmanija endet rrugëve të qytetit me një def në kohën e syfyrit.

Nahi, nënë e 3 fëmijëve, nuk ka të ardhura nga kjo punë që ka vite që e bën.

– Mësoi t’i binte defit në teqe

Nahi, e njohur edhe si “Halife Nahi” në mesin e banorëve të Sulejmanijes, për Anadolu tha se prej 10 vitesh endet rrugëve duke luajtur me dajre për të zgjuar njerëzit në syfyr.

“Kam shërbyer në medrese dhe teqe. Këtë punë e bëj për hir të Allahut. Nuk e bëj për askënd. Këto gjëra i bëj vetëm për hir të Allahut, jo për të fituar të ardhura”, tha ajo.

Nahi, e cila tregoi se ka shërbyer në teqen e Shejh Muhammed Kesnezanit për dy vjet dhe ka qenë brenda kulturës së teqes për shumë vite, tha se ajo mësoi t’i binte dajres aty.

– Njerëzit dalin në ballkone dhe xhirojnë

“Nëse moti është i mirë, unë i zgjoj njerëzit natën me zhurmën e dajres që të dalin dhe të përgatiten për agjërimin. Kur bie shi, nuk mund të dal sepse nuk mund të mbaj çadrën dhe të luaj me dajre”, tha Nahi.

Duke u shprehur se i pëlqen të luajë me dajre në rrugët e qytetit, Nahi theksoi se do të vazhdojë ta bëjë këtë punë për aq kohë sa ia mundëson shëndeti.

“Është pak e vështirë për gratë e komunitetit musliman që të luajnë dajre jashtë natës. Prandaj ndonjëherë gratë dalin në ballkone dhe më xhirojnë sepse u duket interesante. Por, mua më duket shumë normale”, tha Nahi.