Njëri nga të plagosurit mbrëmë para Spitalit të Tetovës në gjendje të rëndë
Njëri nga dy të plagosurit para urgjencës në Tetovë mbrëmë është në gjendje të rëndë.
Pavarësisht ndërhyrjes kirurgjike gjendja e tij shëndetësore nuk është përmirësuar njoftojnë nga Klinika e Shkupit, shkruan Alsat.
Edhe i plagosuri tjetër po kurohet në të njëjtin spital por është në gjendje të qëndrueshme.
Ndërkaq policia ka arrestuar katër nga pesë personat e përfshirë në gjuajtjen me armë zjarri para urgjencës së Tetovës ku mbetën të plagosur A.M. 41 vjeç dhe Z.M. 36 vjeç. Sipas policisë, të dyshuarit janë arrestuar mbrëmë rreth orës 23 e 10 minuta. Fillimisht është arrestuar 55 vjeçarja Sh. E. nga Tetova, ndërsa më vonë, edhe personat R.T., 35 vjeç, M.T., 44 vjeç dhe N.M 39 vjeç, ndërsa personi i pestë sipas Policisë së Tetovës, është ende në arrati.
“Po merren masa për gjetjen e një personi tjetër. Prokurori publik dhe një ekip nga SPB-Tetovë kanë kryer këqyrje të plotë në vendin e ngjarjes dhe punohet për zbardhjen dhe dokumentimin e rastit, pas së cilës ndaj personave të përfshirë në këtë rast do të vijojnë kallëzime përkatëse”, thonë nga SPB Tetovë.
Sipas informatave nga SPB Tetovë, gjuajtjes me armë zjarri para urgjencës së Tetovës, i ka paraprirë zënka mes dy grupeve në mesditë, përpara Gjykatës së Tetovës respektivisht pas daljes nga seanca gjyqësore. Për mosmarrëveshjet mes tyre palët kanë qenë në gjyq.
Incidentin e dënoi Ministri i Shëndetësisë Fatmir Mexhiti dhe tha se nuk ka lidhje me spitalin.
“Në Tetovë siç e dimë, bëhet fjalë për dy grupe, me probleme të pazgjidhura, dy persona janë plagosur dhe dërguar në Shkup. Problemi nuk është i ndërlidhur me spitalin e Tetovës. Pjesa tjetër i mbetet organeve kompetente, do të zgjidhin MPB-ja dhe prokuroria..”, tha Fatmir Mexhiti, Ministër i Shëndetësisë.
