SHBA-ja dhe Rusia sot bëhen bashkë në Arabinë Saudite, në fokus lufta në Ukrainë
Delegacionet e nivelit të lartë nga SHBA-ja dhe Rusia do të takohen në Arabinë Saudite për të diskutuar përfundimin e luftës në Ukrainë, raporton Anadolu.
Ministri i Jashtëm rus Sergey Lavrov dhe Yuri Ushakov, këshilltar për politikën e jashtme të presidentit Vladimir Putin, mbërritën dje në kryeqytetin Rijad.
Gjatë bisedimeve, SHBA-ja do të përfaqësohet nga Sekretari i Shtetit Marco Rubio, Këshilltari i Sigurisë Kombëtare Mike Waltz dhe i dërguari i posaçëm për Lindjen e Mesme, Steve Witkoff.
Takimi vjen pasi presidenti amerikan Donald Trump mbajti telefonata të veçanta javën e kaluar me Putinin dhe presidentin ukrainas Volodymyr Zelenskyy në një përpjekje për t’i dhënë fund luftës trevjeçare.
Por, Ukraina nuk do të marrë pjesë në bisedime, pasi nuk ishte e ftuar. Zelenskyy tha se Ukraina “nuk do të pranojë kurrë” asnjë marrëveshje të arritur pa pjesëmarrjen e Kievit.
Zelenskyy do të takohet me homologun e tij turk Recep Tayyip Erdoğan sot në kryeqytetin Ankara, ku do të diskutojnë marrëdhëniet dypalëshe, zhvillimet e fundit në Ukrainë dhe çështje të tjera rajonale dhe globale.
Udhëheqësit e disa vendeve të mëdha evropiane u mblodhën në Paris të hënën me ftesë të presidentit francez Emmanuel Macron për të diskutuar mbi marrëdhëniet transatlantike, situatën në Ukrainë, negociatat e mundshme të paqes dhe sigurinë në Evropë.
Marrëdhëniet SHBA-Evropë u përkeqësuan këtë muaj pasi Trump nisi diskutime të drejtpërdrejta me Putinin për bisedimet e paqes në Ukrainë pa përfshirjen evropiane.
Në Konferencën e Sigurisë së Mynihut të fundjavës, Keith Kellogg, i dërguari special i Trumpit për Rusinë dhe Ukrainën, konfirmoi se evropianët nuk do të ftoheshin në bisedimet e planifikuara të paqes SHBA-Rusi për Ukrainën.
