Mexhiti nga Brukseli: Pushteti lokal kyç për reformat evropiane
Bashkëkryetari i VLEN-it, Izet Mexhiti, po merr pjesë në sesionin e Komitetit të Përbashkët Konsultativ (JCC) pranë Komitetit Evropian të Rajoneve, ku theksi është vendosur te roli i pushtetit lokal në procesin e integrimit evropian.
Mexhiti bëri të ditur se në këtë forum janë mbledhur përfaqësues të pushtetit lokal dhe rajonal nga vendet anëtare të Bashkimit Evropian, si dhe nga shtetet kandidate, për të shkëmbyer përvoja dhe për të forcuar bashkëpunimin ndërinstitucional.
“Sot ndodhemi në Bruksel, ku po mbahet sesioni i Komitetit të Përbashkët Konsultativ, një forum i rëndësishëm ku diskutojmë sfidat dhe mundësitë në procesin e integrimit evropian,” deklaroi Mexhiti.
Ai theksoi se pushteti lokal ka një rol të pazëvendësueshëm në këtë proces, duke qenë në vijën e parë të zbatimit të reformave dhe përafrimit me standardet evropiane.
“Integrimi në BE mbetet prioritet strategjik i Maqedonisë së Veriut, ndërsa komunat kanë rol kyç si në procesin eurointegrues ashtu edhe në zbatimin e reformave,” u shpreh ai.
Sipas Mexhitit, diskutimet në Bruksel janë përqendruar në rrugën drejt anëtarësimit, vazhdimin e reformave dhe fuqizimin e pushtetit lokal si faktor vendimtar në afrimin e vendit me Bashkimin Evropian.
“Komunat janë partnerë të drejtpërdrejtë në përmbushjen e agjendës së integrimit dhe në përafrimin e standardeve lokale me ato evropiane,” theksoi Mexhiti.
Ai shtoi se bashkëpunimi ndërmjet komunave dhe institucioneve evropiane është thelbësor për të përshpejtuar procesin integrues dhe për të sjellë përfitime konkrete për qytetarët.
