SHBA do ecë përpara me shitjen e motorëve të avionëve luftarakë për Turqinë
Administrata e presidentit amerikan, Donald Trump, po planifikon të vazhdojë me shitjen e dhjetëra motorëve të avionëve luftarakë për Turqinë, me vlerë prej qindra milionë dollarësh, pavarësisht kundërshtimeve të disa anëtarëve të Kongresit amerikan, thanë të mërkurën katër burime të njohura me çështjen. Ky veprim konsiderohet një gjest i rëndësishëm ndaj Ankarasë para samitit të NATO-s që do të mbahet atje muajin e ardhshëm.
Motorët, të prodhuar nga General Electric (GE), do të përdoren për avionin e parë luftarak vendas të Turqisë, KAAN, një projekt madhor i nisur në vitin 2016 si pjesë e përpjekjeve të Ankarasë për të qenë më e pavarur në fushën e mbrojtjes. Një nga burimet tha se paketa do të ketë vlerë mbi 700 milionë dollarë.
Turqia dhe Shtetet e Bashkuara në përgjithësi kanë pasur marrëdhënie të mira gjatë presidencës së Donald Trump, i cili shpesh ka lavdëruar presidentin turk Recep Tayyip Erdoğan. Megjithatë, marrëdhëniet mes dy vendeve janë vënë në provë nga mosmarrëveshjet lidhur me vendimin e Uashingtonit për ta përjashtuar Turqinë nga programi i avionëve luftarakë F-35 dhe për t’i vendosur sanksione pas blerjes së sistemeve ruse të mbrojtjes ajrore S-400, të cilat SHBA-ja i konsideron rrezik për sigurinë.
Edhe pse shitja e motorëve pritet të mirëpritet në Ankara, analistët thonë se ajo mbetet larg objektivit më të gjerë të Turqisë për t’u rikthyer në programin F-35.
“Sigurimi i motorëve është sigurisht i rëndësishëm për Turqinë, por është gjithashtu hapi më i lehtë për një administratë amerikane që ka bërë premtime shumë më ambicioze ndaj Ankarasë, përfshirë rikthimin e Turqisë në programin F-35,” tha Gonul Tol, drejtoreshë e programit turk në Institutin e Lindjes së Mesme me bazë në Uashington.
Ajo shtoi se prova e vërtetë nëse Uashingtoni dhe Ankaraja mund të hapin një kapitull të ri në marrëdhëniet dypalëshe qëndron pikërisht te kjo çështje.
Ligji amerikan nuk i lejon Turqisë të operojë ose posedojë sistemin S-400 nëse dëshiron të rikthehet në programin F-35. Megjithatë, ambasadori amerikan në Turqi, Tom Barrack, deklaroi në dhjetor se marrëdhënia e ngrohtë mes Trumpit dhe Erdoganit i ka ndihmuar të dyja palët të zhvillojnë “bisedat më frytdhënëse që kemi pasur për këtë temë në gati një dekadë”.
Ministria e Jashtme e Turqisë nuk pranoi të komentojë.
Turqia do të presë liderët e NATO-s më 7 dhe 8 korrik, në një kohë kur aleanca po përballet me tensione lidhur me ndarjen e barrës financiare, shpenzimet për mbrojtje dhe ankesat e SHBA-së për rolin e aleatëve në përpjekjet për të mbajtur të hapur Ngushticën e Hormuzit gjatë luftës SHBA-Iran, raporton REUTERS.
