Trump: Kam një vendim të madh për Iranin
Presidenti i SHBA-së, Donald Trump, tha se ka një “vendim të madh” për të marrë në lidhje me Iranin, duke lënë të kuptohet se një marrëveshje mund të arrihet pas zgjedhjeve të mesmandatit.
Gjatë fjalimit të tij në Asamblenë e Përgjithshme të Kombeve të Bashkuara, Trump falënderoi Këshillin e Sigurimit të OKB-së “për votimin me shumicë dërrmuese për të miratuar një rezolutë që dënon sulmet e neveritshme terroriste të Iranit ndaj anijeve tregtare”.
“Tani duhet të jemi po aq të bashkuar në ruajtjen e presionit”, shtoi ai.
Sipas presidentit amerikan, “Marina e Shteteve të Bashkuara kohët e fundit ka shoqëruar më shumë se 1 miliard fuçi naftë nga Ngushtica e Hormuzit, dhe po rrjedh më shumë naftë se në çdo moment që nga fillimi i luftës”.
Megjithatë, Trump tha: “Kam një vendim të madh për të marrë.”
Më pas, ai parashtroi dy mundësi për të ardhmen e Iranit:
“A do të arrihet një marrëveshje me Iranin që do t’i lejojë ata të rindërtojnë dhe të krijojnë një vend shumë më të madh se sa ka qenë ndonjëherë më parë, ndoshta një nga më të mëdhenjtë në Lindjen e Mesme apo edhe në botë? Apo ta shkatërroj Republikën Islamike dhe ta bëj këtë shpejt, duke mos u dhënë më kurrë atyre një shans për të vrarë dhe shkatërruar njerëz dhe vende? A t’i çoj në ferr pa asnjë shans mbijetese dhe pa shpresë për madhështi apo breza të ardhshëm?” pyeti presidenti.
Trump shprehu bindjen se një marrëveshje mund të arrihet pas zgjedhjeve të mesmandatit.
“Por unë besoj se do të bëjmë një marrëveshje menjëherë pas zgjedhjeve, sepse nuk ka kuptim që ata të mos e bëjnë këtë”, tha ai.
Në vijim, Trump pretendoi se autoritetet iraniane po presin të shohin rezultatin e zgjedhjeve të mesmandatit në SHBA.
“Ata po presin të shohin se si do të dal unë në zgjedhjet e mesit të mandatit; ajo që ata nuk e kuptojnë është se unë nuk po kandidoj”, tha Trump.
