Escobar sonte në Prishtinë, takon opozitën

I dërguari i Shteteve të Bashkuara të Amerikës për Ballkanin Perëndimor, Gabriel Escobar, këtë të enjte do të takojë përfaqësuesit e opozitës në Prishtinë.

Takimi do të mbahet në ambasadën amerikane ku Escobar do të shtrojë darkë për opozitën, kanë bërë të ditur burimet e Telegrafit.

Sipas të njëjtave burime, në këtë takim nga Partia Demokratike e Kosovës do të marrë pjesë lideri i saj, Memli Krasniqi, nga Aleanca për Ardhmërinë e Kosovës, Ardian Gjini (meqë kryetari i partisë, Ramush Haradinaj gjendet jashtë shtetit), ndërsa nga Lidhja Demokratike e Kosovës ende nuk dihet.

Escobar pritet që të premten të takohet edhe me kryeministrin Albin Kurti dhe presidenten Vjosa Osmani.

Ndryshe, Gabriel Escobar qëndroi të mërkurën në Serbi ku u takua me presidentin Aleksandar Vuçiq dhe përfaqësuesit e opozitës pro-evropiane.

Vuçiq pas takimi tha se ka zhvilluar një “bisedë të hapur dhe korrekte”.

Ai shkroi në llogarinë e tij në Instagram: “Besoj në përmirësimin e mëtutjeshëm të marrëdhënieve ndërmjet Serbisë dhe SHBA-së”.

Ndërsa në komunikatën e Presidencës së Serbisë, thuhet se është diskutuar procesi i normalizimit të marrëdhënieve me Kosovën, formimi i Asociacionit të komunave me shumicë serbe dhe mundësitë për gjetjen e zgjidhjeve përmes kompromisit dhe të qëndrueshme në dialogun e zhvilluar me ndërmjetësimi i Bashkimit Evropian”.

“Presidenti Vuçiq përsëriti qëndrimin e pandryshuar të Serbisë në lidhje me ruajtjen e paqes dhe stabilitetit në rajon dhe zgjidhjen e çështjeve të hapura ndërmjet Beogradit dhe Prishtinës, me theks në zbatimin e plotë të marrëveshjeve të nënshkruara deri më tani dhe ruajtjen e interesave shtetërore dhe kombëtare”, thuhej në komunikatë.

Takimet e të dërguarit të SHBA-së vijnë dy ditë para takimit të nivelit të lartë mes Kosovës dhe Serbisë. Kurti e Vuçiq do të takohen të shtunën në Ohër të Maqedonisë së Veriut.

Në takimin e 18 marsit pritet që Kosova dhe Serbia të bisedojnë për zbatimin e Propozimit evropian.