Qeveria shkarkoi dy drejtorë të M-NAV – Këta janë drejtorët e rinj

Dramë e vërtetë në Qeveri për emrin e drejtorit të M-Nav. Pasi paraprakisht ekzekutivi kishte shkarkuar dy nga tre drejtorët Fahrudin Hamidin dhe Lube Stamenkovskin për drejtues të bordit propozoi Milan Koraq dhe Ilir Mehmedin, por doli që ky i fundit nuk i plotëson kushtet, nuk ka leje për kontrollor mbikëqyrës për fluturime e as përvojë pune si kontrollor. Në vend të tij Qeveria tani ka propozuar emrin e Hekuran Asanit, kontrollor aktiv në M-Nav.

Qeveria gjithashtu ka kërkuar nga Agjencia për navigacion civil dhe ajror të bëjë inspektim të jashtëzakonshëm në punën e M-NAV si dhe Inspektoratin e punës të bëjë inspektime të jashtëzakonshme në punën e sindikatave në kuadër të M-NAV.

Vendimi i qeverisë erdhi si reagim pas zhvillimeve të disa ditëve të fundit, të cilët kulmuan me sulm dhe dhunë fizike në hapësirat e navigacionit të Maqedonisë, në të cilin morën pjesë funksionari i BDI-së Bekim Neziri dhe shtatë persona të tjerë. Shkarkimi i drejtorëve të deritanishëm kishte qenë kërkesë e Sindikatës së të punësuarve në M-NAV të cilët kishin kërcënuar se nëse kjo nuk ndodh, do të bëjnë grevë duke mbyllur hapësirën ajrore mbi Shkup.

Sindikata kishte akuzuar përgjegjësit për punësime partiake në vend të kuadrove profesional.

Nga VMRO-DPMNE-ja thonë se shkarkimi i drejtorëve të M-NAV nuk mjafton.

“Nuk mjafton vetëm shkarkimi i drejtorëve por të kërkohet edhe përgjegjësi nga komanduesit dhe pranga në duar. Kush e porositi dhunën në kullën e kontrollit? Kush ka lejuar dhunë deri sa avionët qarkullojnë mbi Shkup. Kush është përgjegjës për përzgjedhjen e sigurimit në objekt strategjik? Për këto çështje duhet të shihet edhe përgjegjësia e ministrive përgjegjëse, nga Lidhje dhe Transport, deri te MPB-ja, Boçvarski dhe Spasovski. Ligji është i qartë. Kjo nuk është “zënkë” mes kolegëve, është rrezikim i sigurisë së transportit ajror”, deklaroi Naum Stoillkovski, VMRO-DMNE.

Ndërkohë, në M-NAV sot ka hyrë Policia financiare. Nga atje për mediat njoftojnë se do të bëjnë konktrolle për të parë a ka dyshime për vepra penale në procedurat financiare./alsat