Mickoski nga Uashingtoni: Maqedonia dhe rajoni kanë qenë peng të së kaluarës për një kohë të gjatë

Mirëmbrëma nga Uashingtoni

Përfundoi edhe një ditë pune në Samitin e NATO-s, i cili po mbahet me rastin e 75-vjetorit të formimit të Aleancës.

E udhëheq delegacionin maqedonas dhe mund të them se kaluam një ditë vërtet dinamike, plot me takime dhe mbledhje që patëm në margjinat e Samitit të NATO-s.

Sot biseduam me Kryeministrin malazez, biseduam me Presidentin kroat, Kryeministrin hungarez, normalisht këtu do të veçoja takimet dhe takimet me Kryeministren italiane Meloni, me Kryeministrin spanjoll Sançez që ishte bashkë me mua, do të thosha pranë meje në darkën e organizuar nga Presidenti i SHBA-së Biden, bashkëshortja e tij Xhill Biden. Nga ajo që mund të veçoj janë edhe takimet me fqinjët, kryeministrin bullgar dhe atë shqiptar.

Mund të them se kam dërguar disa mesazhe, ndër të cilat më e rëndësishmja është se për një kohë të gjatë rajoni dhe Maqedonia si shtet ishin peng të së kaluarës. Duhet të fokusohemi tek e ardhmja dhe ajo që vjen me të ardhmen. Ta bëjmë Maqedoninë sërish krenare, por edhe ta bëjmë sërish krenar Ballkanin. Të jemi fqinjë të mirë, të kuptojmë njëri-tjetrin dhe të bashkëpunojmë. Kjo është ajo që qytetarët presin nga ne dhe kjo është ajo që unë si Kryetar i Qeverisë do të jem i fokusuar në vitet në vijim.

Më tej, dua të them se mesazhi i dytë që dërgova është se ka kaluar koha e shpinës së përkulur, ka kaluar koha e politikanëve të korruptuar që vijnë nga Maqedonia dhe politikanëve që janë të gatshëm nga emri të mbrojnë korrupsionin dhe krimin e tyre dhe me plotkuptimin e fjalës të bëjnë gjithçka. Të firmosin gjithçka, të pranojnë çdo përulje që do t’u ofrohet në tavolinë vetëm për të mbrojtur krimin e tyre. Ajo kohë tashmë është histori dhe e kaluar. Duhet të flasim si partnerë të vërtetë, të flasim si fqinjë, sepse partneriteti dhe fqinjësia e mirë është rrugë e dyanshme dhe ne duam ta kultivojmë atë dhe ta shohim vetëm kështu.

Edhe një herë dua t’ju dërgoj një urim të madh Maqedoni, ne ju duam dhe bëhuni krenarë sepse me të vërtetë po bëjmë çmos për të rimarrë atë dinjitet të humbur që fatkeqësisht nuk e kemi pasur në 7 vitet e fundit, jo vetëm këtu në Uashington, por kudo në botë sepse nuk përfaqësoheshim nga politikanë, të cilët, për fat të mirë të qytetarëve, tashmë i përkasin të shkuarës.