S’ka kafe për shqiptarët në Prilep! (Video)

Është e vështirë të jesh shqiptar në Prilep. Për t`u shkolluar duhet të udhëtosh me kilometra, bukën e fitojnë duke u zgjuar në 2 të mëngjesit për të shkuar tek arat, e mundi në fund nuk iu paguhet sa duhet.

E sikur këto vështirësi mos të jenë të mjaftueshme, ata diskriminohen edhe kur duan të paguajnë në objekt privat për të pirë kafe.

Kështu ndodhi me Ilirin dhe shokët e tij disa ditë më parë, në një kafene të Prilepit.

Edhe pse lokali ishte i zbrazur, atyre pronari u tha se gjithçka është e rezervuar.

ILIR NEZIRI – BANOR I CËRNILISHTËS

Deshëm të pimë kafe me kolegët, se kishim pak kohë të lirë… Sa u afruam tek lokali, ai punonjësi na tha se tavolinat janë të rezervuara. Pasi që e pamë se më shumë se gjysma e tavolinave ishin të lira, insistuam që të ulemi.

E pyetëm për mënyrën se si rezervohet, na tha se nëpërmjet internetit duhet të bëhet rezervimi.

E thirrën sigurimin, na thanë se duhet ta lëshojnë lokalin.

I bëmë pyetje atij që punonte si sigurim, i thamë; A pse jemi shqiptarë nuk ka vend për ne? Ai këtë nuk e mohoi, indirekt e pranoi shkaku se na tha se neve si na urdhërojnë ashtu edhe punojmë.

Rastin ishte paraqitur në polici, por policia u kishte thënë që nuk ka bazë për kallëzim penal sepse nuk ka prova. Iliri kërkoi ndihmë nga Klan, që të dëshmojë se sjellja e pronarëve të lokalit ka qenë diskriminuese. Shkuam tek i njëjti lokal. Fillimisht hyri kameramani ynë, i cili foli vetëm në gjuhen maqedonase, e më pas erdhën edhe dy djem tjerë të Cërnilishtës, shokë të Ilirit… Video në vazhdim e konfirmon se jo gjithkush është i mirëseardhur në këtë lokal, e posaçërisht nuk janë të mirëseardhur shqiptarët.

….Mos më bëni turma tek dera, ka njerëz që duan të futen, nëse dëshironi dilni jashtë.

Jo është e rezervuar,

Si është e rezervuar?

Dëshironi që të argumentojmë?

Por përse..

Sepse është e rezervuar

Prit pak e sheh se po më bëni turma në rrugë, njerëzit duan të dalin këta, largohuni!

Por në të njëjtin lokal, në të njëjtat tavolina, kameramani i Klan u ul pa problem.

Iliri shpreson se kjo do të jetë provë e mjaftueshme që policia dhe prokuroria të reagojë.

ILIR NEZIRI

Duhet të reagojmë për shkak se ky nuk është rasti i vetëm.

Rasti jo që nuk është i vetëm, por para disa muajve i ka ndodhur edhe personit me të cilin duhej të mburret i gjithë Prilepi, lojtarit të Leeds United dhe i përfaqësuese së Maqedonisë, Xhani Alijoskit. /KlanMacedonia

Ndiqeni videon në linkun më poshtë: