Haxhiu: Thaçi po realizon atë që Stanishiqi vetëm ëndërr ka mundur ta shohë

Deputetja e Lëvizjes Vetëvendosje, Albulena Haxhiu, e ka kritikuar ashpër presidentin e Kosovës, Hashim Thaçin, pas vendimit të shtetit Kosovar që Vuçiqit t’i lejohet edhe vizita tek Liqeni i Ujmanit.

Haxhiu thotë se Thaçi u nënshtrua përballë Vuçiqit.

“Thaçi iu nënshtrua Vuçiqit. Llafet e tij pa mbulesë për Kosovën Lindore dhe lavdërimet cinike të Vuçiqit për të si politikan më i zoti, po kurorëzohen me serbizim të liqenit të Ujmanit”, ka shkruar Haxhiu në profilin e saj në facebook.

Ajo thotë se në këtë formë po realizohet plani i Stanishiqit.

“ Duket që karkalecat e detit dhe verërat e shtrenjta mbi 120 euro po e realizojnë atë që Stanishiqi vetëm në ëndërr ka mundur ta shohë”, përfundon reagimi i deputetes së Levizjes Vetëvendosje, shkruan Gazeta Express.

Kujtojmë që Vuçiq do të arrij sot në Kosovë për vizitën e tij dy ditore. Në planet e tij është edhe vizita tek Liqeni i Ujmanit, gjë që fillimisht iu ndalua nga autoritetet kosovare, por që më vonë, pas presionit të BE-së, iu lejua një gjë e tillë.