ASH: Lirimi i Orce Kamçevit, vendim skandaloz

Aleanca për Shqiptarët sot në konferencë për shtyp e vlerësoi si skandaloz vendimin e Gjykatës së apelit për lirimin nga paraburgimi biznesmenin Orce Kamçev.

Sipas tyre, lirimi nga paraburgimi është bërë me paratë e qytetarëve.

“Këto ditë në vend mediat njoftuan për një tjetër vendim skandaloz të Gjykatës së Apelit në Shkup. Lirohet edhe një bashkëpunëtor i regjimit të kaluar dhe atij hibrid aktual të udhëhequr nga Ahmeti-Mijalkov-Zaev. Në të njëjtën mënyrë, si shumë kriminelë të tjerë, lirinë e bleu edhe Orce Kamçev, një nga të akuzuarit kryesorë për veprat më të rënda të keqpërdorimit të parave të qytetarëve. Kamçevi, ashtu si Mijallkovi, e blen lirinë me paratë që dyshon se i ka vjedhur nga xhepat tuaj. Ky rast, si në rastet e mëparshme, vetëm sa konfirmon atë që ne kemi konstatuar prej vitesh. Në Maqedoninë e Veriut mafia krijoi shtet, mafia merr shtetësi, ndërsa qytetarët që nuk kanë 11 milionë euro mbahen të pafajshëm nëpër burgje”, theksoi në konferencë për shtyp, deputeti i Aleancës për Shqiptarët, Adnan Neziri.

Ai porositi se drejtësia është vonë, por nuk harron dhe se të gjithë ata që kanë nevojë një ditë do të mbajnë përgjegjësi dhe qytetarët e pafajshëm do ta ndjejnë dhe gëzojnë lirinë.