Çavuşoğlu: Në takimin në Stamboll u arrit progresi më domethënës që nga fillimi i negociatave

Shpërndaje

Ministri i Punëve të Jashtme të Turqisë, Mevlüt Çavuşoğlu, përshëndeti raundin e fundit të bisedimeve të paqes Rusi-Ukrainë në Stamboll, duke thënë se në takim u arrit “progresi më domethënës që nga fillimi i negociatave”, raporton Anadolu Agency (AA).

Duke folur në një konferencë për media, Çavuşoğlu tha se ishte i kënaqur që shihte më shumë “afrim” midis dy palëve në “çdo fazë”.

Për bisedimet e paqes që po zhvillohen në Stamboll, Çavuşoğlu tha: “Kjo është një tregues i besimit të palëve në Turqi”.

Ai shtoi se “prioriteti kryesor është të arrihet një armëpushim sa më shpejt të jetë e mundur dhe të hapet rruga për një zgjidhje të përhershme politike”.

Rusia dërgoi trupa në Ukrainë në atë që e quajti një “operacion ushtarak special” më 24 shkurt. Lufta ka hasur në zemërim ndërkombëtar dhe vendet perëndimore kanë zbatuar sanksione të ashpra financiare ndaj Moskës.

Turqia ka fituar vlerësime të gjera për përpjekjet e saj për t’i dhënë fund luftës, e ndihmuar nga pozicioni i saj unik në marrëdhëniet miqësore me Rusinë dhe Ukrainën.

Më 10 mars, Turqia priti ministrat e Jashtëm të Rusisë dhe Ukrainës në qytetin Antalya, takimi i nivelit më të lartë të dy palëve që nga fillimi i luftës.

Raundi i ri i bisedimeve zgjati për tre orë dhe negociatorët rusë dhe ukrainas më vonë mbajtën konferenca të veçanta për media për të informuar botën për rezultatin.

Ukraina ka bërë thirrje që tetë vende, përfshirë Turqinë, të jenë garantues në një marrëveshje të mundshme paqeje në të ardhmen. Rusia ka njoftuar se do të ulë ndjeshëm aktivitetet ushtarake në drejtim të qyteteve ukrainase Kiev dhe Chernihiv, për të rritur besimin për negociatat e ardhshme.