Evropa vendos në izolim pasagjerët e anijes së prekur nga hantavirusi
Pasagjerët e anijes turistike MV Hondius, e goditur nga shpërthimi i hantavirusit, janë kthyer në vendet e tyre, ku do t’i nënshtrohen testeve mjekësore dhe izolimit.
Anija mbërriti të dielën në Ishujt Kanarie në Spanjë me 147 persona në bord, përfshirë pasagjerë dhe ekuipazh nga 23 shtete të ndryshme, ndër ta 70 evropianë.
Sipas autoriteteve spanjolle, shpërthimi i hantavirusit – një sëmundje virale e rrallë dhe potencialisht vdekjeprurëse – bëri që anija të vendosej nën protokolle emergjente.
Në bashkëpunim me Organizatën Botërore të Shëndetësisë dhe Qendrën Evropiane për Parandalimin dhe Kontrollin e Sëmundjeve, të gjithë pasagjerët u kontrolluan për simptoma dhe më pas u organizua kthimi i tyre në vendet përkatëse.
Në Spanjë, 14 shtetas janë vendosur në Spitalin Ushtarak Gómez Ulla në Madrid, ku do të qëndrojnë në karantinë 42-ditore dhe do t’u bëhen teste të rregullta PCR.
Në Francë, pesë persona janë kthyer nga Spanja, ndërsa njëri prej tyre ka shfaqur simptoma gjatë transferimit dhe është konfirmuar si rasti më i ri me hantavirus. Autoritetet franceze kanë njoftuar se pasagjerët do të qëndrojnë në izolim për 42 ditë.
Në Holandë, 26 pasagjerë kanë mbërritur në Eindhoven dhe do të qëndrojnë në vetizolim për 42 ditë.
Gjermania kishte tetë persona në bord, përfshirë një nga viktimat. Katër pasagjerë gjermanë janë transferuar në një spital në Frankfurt për ekzaminime para karantinës.
Belgjika ka pranuar dy pasagjerë, të cilët janë dërguar për kontroll mjekësor në Spitalin Universitar të Antwerpit.
Në Greqi, një shtetas grek është vendosur në karantinë parandaluese për 45 ditë në Spitalin Universitar Attikon në Athinë.
Dy pasagjerë janë transferuar edhe në Irlandë, ku po monitorohen në një qendër mjekësore në Dublin.
Ndërkohë, autoritetet britanike kanë bërë të ditur se 20 shtetas britanikë, një shtetas gjerman me banim në Britani dhe një pasagjer japonez po monitorohen në spitalin Arrowe Park në Anglinë veriperëndimore. /euronews
