Kurti në përvjetorin e Banjskës: Radoiçiq dhe grupi i armatosur duhet të përballen me drejtësinë në Kosovë

Kryeministri i Kosovës, Albin Kurti, ka deklaruar se sulmi i armatosur në Banjskë, i ndodhur më 24 shtator 2023, ishte një përpjekje për të goditur sovranitetin dhe integritetin territorial të Kosovës.
Në akademinë përkujtimore në nderim të rreshterit të Policisë së Kosovës, Afrim Bunjaku, i cili u vra gjatë sulmit, Kurti tha se situata në veri ka ndryshuar ndjeshëm gjatë viteve të fundit. Sipas tij, institucionet e Kosovës kanë zgjeruar praninë e tyre, ndërsa strukturat kriminale që, sipas tij, vepronin me mbështetje nga Beogradi kanë humbur ndikimin, transmeton lajmi.net.

“Në vazhdimësi e për shumë vite është shkruar dhe përfolur për veriun e Kosovës si vatër destabilizimi, tokë e askujt, zonë e pakontrolluar ku lulëzon krimi i organizuar, strukturat paralele dhe grupet kriminale”, tha Kurti.

Ai tha se përpjekjet për ndryshimin e kësaj gjendjeje janë kundërshtuar nga struktura që, sipas tij, kanë qenë të organizuara dhe të drejtuara nga Beogradi.

“Kjo situatë e papranueshme dhe alarmuese duhej të ndryshonte medoemos. Ndryshimi në kalimin nga anomalia në normalitet, u përball me mobilizim të strukturave e grupeve kriminale të dirigjuara dhe organizuara nga Beogradi zyrtar”, deklaroi kryeministri.

Kurti: Sulmi në Banjskë ishte i mbështetur nga Serbia

Duke folur për ngjarjet e 24 shtatorit 2023, Kurti e përshkroi sulmin si një aksion paramilitar dhe tha se grupi i armatosur ishte mbështetur nga Serbia.

“Sulmi paramilitar i 24 shtatorit në Banjskë tri vite më parë, u bë nga një grup terroristësh të mbështetur e financuar, trajnuar dhe instruktuar nga shteti i Serbisë, udhëhequr nga Millan Radoiçiq”, tha ai.

Sipas Kurtit, pjesëtarët e grupit kishin uniforma taktike dhe armatim të prodhuar apo të përdorur nga strukturat ushtarake serbe.

“Të veshur me uniforma taktike ushtarake e të pajisur me armatim të Ushtrisë dhe Forcave të Armatosura të Serbisë, atë mëngjes, hasën në një patrullë policore të Policisë së Kosovës, pjesëtarët e së cilës i sulmuan”, u shpreh Kurti.

Kryeministri përkujtoi edhe momentin e vrasjes së rreshterit Afrim Bunjaku, duke thënë se ai u vra gjatë përballjes me grupin e armatosur.

“Duke e aktivizuar një minë me kabllo nga distanca, terroristët serbë e vranë Rreshterin Afrim Bunjaku dhe e plagosën zyrtarin policor Alban Rashiti”, tha Kurti.

Kërkesë për drejtësi për Radoiçiqin

Tre vjet pas sulmit, Kurti kërkoi që Milan Radoiçiq dhe personat e tjerë të përfshirë në sulm të përballen me drejtësinë në Kosovë.

“Tre vite nga sulmi i Banjskës, Millan Radoiçiq dhe pjesëtarët e tjerë të grupit terrorist paramilitar, vazhdojnë të strehohen nga presidenti i Serbisë, teksa i ofron mbrojtje dhe shërbime. Ata duhet të përballen me drejtësinë në Kosovë dhe të gjykohen për sulmin me përmasa ushtarake të organizuar ndaj shtetit tonë dhe vrasjen e Afrim Bunjakut. Ne nuk do të ndalemi derisa të ketë drejtësi”, deklaroi ai.

Kurti e cilësoi Bunjakun si një pjesëtar të Policisë së Kosovës që humbi jetën në krye të detyrës.

“Afrimi, heroi ynë, i doli në ballë terroristëve të këtij agresioni shtetëror e sulmi kriminal. Ai u vra duke mbrojtur shtetin dhe paqen”, tha kryeministri.

Kurti: Në veri është zgjeruar prania e institucioneve

Sipas Kurtit, pas përfundimit të sulmit të Banjskës, institucionet e Kosovës rritën praninë dhe funksionimin e tyre në veri.

“Pas neutralizimit të sulmit të grupit paramilitar serb, për herë të parë nisi funksionimi i plotë i shtetit dhe të gjitha institucioneve të tij në veri të vendit”, deklaroi ai.

Kryeministri përmendi edhe disa prej masave të ndërmarra gjatë tri viteve të fundit. Ai tha se janë mbyllur 62 institucione paralele, është ndërprerë përdorimi i dinarit serb dhe janë hequr nga përdorimi targat dhe patentë-shoferët e strukturave paralele serbe. Po ashtu, sipas tij, janë mbyllur edhe Posta e Serbisë dhe pikat e “NIS Petrol”.

“Periudha e ilegalitetit dhe kriminalitetit mori fund”, deklaroi Kurti.

Ai shtoi se në veri janë hapur institucione dhe zyra të Republikës së Kosovës, ndërsa gjatë kësaj periudhe janë regjistruar edhe biznese të reja dhe, sipas tij, disa familje janë rikthyer në pronat e tyre.

“Siguria u ngrit dhe zgjerua”

Kurti foli edhe për situatën e sigurisë në veri, duke argumentuar se gjendja është përmirësuar krahasuar me periudhat e mëparshme.

“Siguria u ngrit dhe zgjerua, e rrjedhimisht sundimi i ligjit mbizotëron. Psh. përgjatë vitit të kaluar nuk u shënua asnjë rast i vrasjes apo grabitjes së rëndë atje”, tha ai.

Në përfundim të fjalimit, kryeministri e veçoi figurën e Afrim Bunjakut si shembull për pjesëtarët e Policisë së Kosovës.

“Afrim Bunjaku është frymëzim dhe orientim për çdo pjesëtar të Policisë së Kosovës. Ai është dëshmia sesi zyrtari publik e mbron shtetin e së drejtës dhe të drejtën e shtetit”, përfundoi Kurti.