Erdogan: Turqia miraton aplikimin e Finlandës për anëtarësim në NATO, me Suedinë do të vazhdojnë bisedimet
Presidenti turk, Recep Tayyip Erdoğan, pas takimit me homologun e tij finlandez, Sauli Niinisto, ka deklaruar se Türkiye ka vendosur të fillojë në parlamentin e saj procesin e aderimit të Finlandës në NATO meqenëse vendi po përmbush zotimet e tij nga samiti i Madridit, raporton Anadolu.
“NATO do të luajë rol në ruajtjen e sigurisë dhe stabilitetit global duke u forcuar me anëtarësimin e Finlandës”, deklaroi presidenti Erdoğan në konferencën e përbashkët për media me homologun e tij finlandez.
Ndërsa lidhur me aplikimit e Suedisë për anëtarësim në NATO, Erdoğan tha se Türkiye do të vazhdojë bisedimet me Stokholmin “në bazë të parimeve të NATO-s dhe qasjes së saj në luftën kundër terrorizmit”.
Erdoğan tha se Türkiye i dërgoi një listë me 120 terroristë Stokholmit dhe deri më tani asnjë prej tyre nuk është ekstraduar.
“Suedia ka përqafuar terroristët, gjë që nuk ndodhi në rastin me Finlandën”, u shpreh ai.
Presidenti finlandez, nga ana e tij, falënderoi presidentin turk, si dhe theksoi se presidenti Erdoğan është “një nga të paktët, nëse jo i vetmi, që zhvillon bisedime për gjithçka me të gjithë”.
Lidhur me procesin e miratimit të Türkiyes për anëtarësimin e Finlandës në NATO, presidenti Niinisto falënderoi në emër të të gjithë popullit finlandez.
“Është një lajm i rëndësishëm për të gjithë”, deklaroi Niinisto.
