Afrim Gashi: Do të hyjmë në Qeveri ti zhbllokojmë integrimet e Shqipërisë!
Derisa Alternativa i vazhdon bisedimet për përfshirje në shumicën parlamentare, sot kryetari i saj, Afrim Gashi, i shoqëruar nga nënkryetari Hysni Ismaili, ka qëndruar në Tiranë, ku ka takuar kryeministrin e Shqipërisë, Edi Rama.
Në këtë takim Gashi thotë se është biseduar për marrëdhëniet e mira ndërmjet dy vendeve si dhe për rëndësinë e madhe që ka hapja e negociatave për aderim në BE për Maqedoninë e Veriut, ngase nga kjo varet edhe fillimi i negociatave për Shqipërinë.
Kryeministri Rama e ka falënderuar kryetarin Gashi për vizitën dhe e ka inkurajuar për rolin konstruktiv që e luan Alternativa në këtë kohë në skenën politike të Maqedonisë së Veriut.
Nga ana tjetër, kryetari Gashi e ka falënderuar kryeministrin Rama për ftesën dhe takimin, duke premtuar se Alternativa do të vazhdojë të mbetet besnike ndaj idealeve madhore kombëtare për integrim të shqiptarëve në Bashkimin Europian.
“Nëse hapja e negociatave për Shqipërinë vetëm pak varet nga vendimi i Alternativës për t’u përfshirë në qeverinë aktuale të Maqedonisë së Veriut, kjo për shkak të ndërlidhjes mes këtyre dy shteteve në rrugën euro-integruese, kjo është gjëja më e paktë që mund ta bëjmë ne për Shqipërinë”, ka theksuar Afrim Gashi.
