Japonia do ta ndryshojë orën shkaku i Lojërave Olimpike

Autoritetet japoneze po shqyrtojnë një sërë masash për të shmangur problemet që lidhen me temperaturat e larta gjatë Lojërave Olimpike të vitit 2020.

Ndër propozimet e shumta është edhe lëvizja e akrepave për dy orë përpara, por ende nuk ekziston një vendim përfundimtar rreth kësaj mundësie.

Rreth 120 persona kanë vdekur si pasojë e të nxehtit nga fillimi i korrikut që ka kapluar Japoninë, e cila ka bërë që autoritetet lokale të reflektojnë mbi masat që do të merren para se të ndodh ndonjë tragjedi.

Thelbi i propozimit është që të lëvizin orën dy orë përpara në mënyrë që atletët e maratonës të mund ta përfundojnë garën e gjatë mbi 42 kilometra.

Në gjë të tillë, qeveritarët japonezë kishin refuzuar ta bëjnë në vitet e pesëdhjeta të shekullit të kaluar, pasi që punëtorët janë ankuar se pronarët e kompanive po i detyrojnë të punojnë më gjatë.

Përveç kursimit të kohës, japonezët janë duke marrë parasysh një sërë masash që mund të bëjë jetën më të lehtë për atletët gjatë garave, duke përfshirë zgjerimin e zonave të gjelbra dhe ndërtimin e vendeve të veçanta që do të thithin më pak nxehtësi. /Telegrafi/