Thaçi sërish mbron qëndrimin e tij: Nuk ka shkëmbim të territoreve, por korrigjim të kufirit

Presidenti i Kosovës, Hashim Thaçi po vazhdon ta mbrojë idenë e korrigjimit të kufirit të Kosovës me Serbinë.

Ai në një postim në Twitter ka shkruar se propozimi i tij për zgjidhje paqësore në mes Kosovës me Serbisë është i qartë.

“Nuk ka ndarje përgjatë vijave etnike, por po në rregullimin e kufirit dhe njohjen reciproke”, ka theksuar Thaçi.

Ndryshe, i pari i Kosovës ka sqaruar idenë për korrigjimin e kufijve, në kuadër të fazës së fundit të dialogut për normalizimin e marrëdhënieve ndërmjet Kosovës dhe Serbisë.

Ai ka theksuar se korrigjimi i kufijve nuk nënkupton ndarje dhe as shkëmbim të territoreve.

Thaçi insiston se Kosova duhet të adresojë kërkesën e Luginës së Preshevës në dialogun me Serbinë.

“Korrigjimi i kufijve nuk është term i shpikur nga unë, por shumë shtete në botë e kanë përdorur si mjet për të tejkaluar hasmëritë, për të zgjidhur problemet, për të krijuar paqe afatgjate. Këto ditë e kam përsëritur shpesh: korrigjimi i kufijve nuk nënkupton ndarje, nuk nënkupton shkëmbim të territorit”, ka theksuar ai. /Telegrafi/

My proposal for a peaceful solution with Serbia is clear: no partition along ethnic lines, but yes to the border adjustment and mutual recognition.

— Hashim Thaçi (@HashimThaciRKS) August 6, 2018