Osmani pret ndihmës sekretaren e shtetit të Zvicrës, i kërkon mbështetje për anëtarësimin në KiE

Presidentja e Kosovës, Vjosa Osmani sot ka pritur në takim Ndihmës Sekretaren e Shtetit dhe Shefen e Divizionit për Evropë dhe Azi në Departamentin Federal për Punë të Jashtme në Konfederatën Zvicerane, ambasadoren Muriel Peneveyre.

Presidenca njofton se në takim është diskutuar për zhvillimet e fundit, anëtarësimin e Kosovës në KiE dhe organizata tjera ndërkombëtare, si dhe për marrëdhëniet Kosovë- Zvicër.

“Në takim u diskutua për zhvillimet e fundit në vend, anëtarësimin e Kosovës në Këshillin e Evropës dhe organizata tjera ndërkombëtare, si dhe për marrëdhëniet bilaterale dhe bashkëpunimin Kosovë-Zvicër. Me këtë rast, theks i veçantë është vënë po ashtu në zhvillimin dhe progresin e Kosovës në fusha strategjike, ndërsa Ambasadorja Peneveyre vlerësoi lartë edhe angazhimin e Presidentes Osmani drejt avancimit të Agjendës për Gratë, Paqen dhe Sigurinë, si dhe fuqizimit të grave dhe vajzave në përgjithësi.”, thuhet në njoftimin e Presidencës.

Osmani ka thënë se mërgata shqiptare është urë e fortë lidhëse mes dy shteteve.

Presidentja ka shprehur mirënjohje për përkrahjen e vazhdueshme të Zvicrës ndaj Kosovës dhe theksoi rëndësinë e vazhdimit të mbështetjes për anëtarësimin në KiE.

“Në takim, Presidentja Osmani shprehu mirënjohjen e thellë për përkrahjen e vazhdueshme të shtetit zviceran ndaj Republikës së Kosovës, përfshirë edhe përkrahjen për anëtarësimin e Kosovës në organizata ndërkombëtare. Në këtë drejtim, Presidentja Osmani theksoi rëndësinë e vazhdimit të mbështetjes së Zvicrës për anëtarësimin e Kosovës në Këshillin e Evropës, duke vënë theksin në impaktin e drejtpërdrejt që ky anëtarësim do të kishte në fuqizimin e të drejtave të njeriut, forcimin e demokracisë, si dhe sundimin e ligjit”, thuhet tutje në njoftim.