Vazhdojnë shpërthimet e shok-bombave në veri të Mitrovicës

Vazhdojnë të jenë prezente shpërthimet e shok-bombave në veri të Mitrovicës.

Edhe të mërkurën mbrëma në veri të Mitrovicës u dëgjua një shpërthim që sipas zyrtarëve policorë dyshohet të jetë shok-bombë.

“Shpërthim i ngjashëm si ditëve të mëhershme. Nuk ka pasur dëme materiale e as të plagosur. Shpërthim i mjeteve të zëshme”, deklaroi Zëvendësdrejtori i policisë për rajonin e Mitrovicës së Veriut, Besim Hoti.

Nga data 10 dhjetor, grupe të serbëve lokalë i barrikaduan rrugët në veri të Kosovës, në shenjë kundërshtimi ndaj arrestimit të një ish-polici serb.

Policia e Kosovës arrestoi Dejan Pantiqin, nën dyshimet se ka marrë pjesë në një sulm kundër zyrtarëve të Komisionit Qendror të Zgjedhjeve në veri.

Gjatë kësaj periudhe, përveç të tjerave, u regjistruan edhe së paku pesë incidente ndaj ekipeve të gazetarëve në veri – në mesin e tyre edhe sulme direkte.