Shkupi frymon lirshëm – era pastron ndotjen
Në Strumicë masa të veçanta për shkak të ndotjes së ajrit. Gjatë mëngjesit së të dielës Shkupi u gjet në vendin e 27-të në listën e ueb-faqes së specializuar “Ajkjuer” që ndjek cilësinë e ajrit në kryeqendrat dhe qytetet më të mëdha të botës.
Përjashtim bën vetëm koncentrimi i grimcave të rrezikshme kancerogjene PM 2.5, veçanërisht në pjesën e Gjorçe Petrovit, që është maksimalisht në kufijt e rrezikshëm.
Më 30 nëntor natën dhe më 1 dhjetor, ajri në Shkup ishte shumë o ndotur dhe kryeqendra u gjet në mesin e dhjetë qyteteve të botës me cilësinë më të keqe të ajrit, para shumë qendrave të mëdha industriale nga Azia.
Pastrimi i djeshëm i ndotjes së ajrit është si rezultat i depërtimit të erës juglindore, kurse parashikimet për shira të përkohshme duhet të ndikojnë që ndotja të ulet dukshëm.
Ndërkohë Qyteti i Shkupit, siç percjell KlanM, i ka quajtur të rrejshme informacionet se ndotja e ajrit në Shkup është në nivelin më të lartë. Sipas tyre, si qytete më të ndotura në 48 orët e fundit kanë qenë Koçani, Strumica, Gjevgjelia, Kavadari dhe Tetova.
Për shkak të ndotjes enorme të ajrit në dy ditët e kaluara në Strumicë, Ministria për Ambient Jetësor ka aktivizuar rekomandimet dhe masat për pragun e tejkaluar të alarmimit për grimcat PM10.
